అగ్నిపథ్ స్కీమ్‌లో మార్పులేంటి ? నాలుగు ప్రశ్నలు-జవాబులు

ఆర్మీలోని మూడు విభాగాల్లోనూ సైనికుల నియామకం కోసం ప్రవేశపెట్టిన అగ్నిపథ్ పథకంలో పెద్ద మార్పు చేశారు.

ఈ మార్పు వల్ల 75 శాతం మంది ‘అగ్నివీర్’ల కు అదనంగా రెండేళ్ల సర్వీసు పొడిగింపు లభిస్తుంది.

పాత నిబంధనల ప్రకారం నాలుగేళ్ల పదవీ కాలం పూర్తయిన తర్వాత కేవలం 25శాతం మంది అగ్నివీరులను మాత్రమే శాశ్వతంగా కొనసాగించేవారు.

మిగిలిన 75శాతం మందిని సర్వీస్ నుంచి తొలగించేవారు.

"మెరిట్ ఆధారంగా ముందే నిర్ణయించిన నిబంధనల ప్రకారం 25శాతం మంది అగ్నివీర్‌లకు రక్షణ దళాలలో రెగ్యులర్ ఉద్యోగాలు ఇస్తాం. మిగిలిన అగ్నివీర్‌లకు వారి ఇష్టాన్ని బట్టి అదనంగా రెండేళ్ల సర్వీస్ వ్యవధిని అందిస్తాం" అని రక్షణ శాఖ ఒక ప్రకటనలో తెలిపింది.

"అదనంగా రెండేళ్ల సర్వీస్ పూర్తి చేసుకున్న తర్వాత అగ్నివీర్‌ల ఇష్టాన్ని బట్టి అలాగే ఎంపిక ప్రమాణాలకు లోబడి వారిని రెగ్యులర్ సైనికులుగా దళాల్లోకి తీసుకుంటారు" అని ఆ ప్రకటనలో పేర్కొంది.

అగ్నిపథ్ స్కీమ్‌లో మార్పులకు కేంద్ర కేబినెట్ ఆమోదం తెలిపింది.

దీనిని 'సెకండ్ టూర్ ఆఫ్ డ్యూటీ' అని పిలుస్తున్నారు.

రాజ్‌నాథ్ సింగ్ ఏం చెప్పారు?

"మీకు తెలిసినట్లుగా మెరిట్ ఆధారంగా 25శాతం మంది అగ్నివీర్‌లను సాయుధ దళాల్లోకి తీసుకుంటారు. అంతకుముందు, ఈ పథకంలో 75శాతం మంది అగ్నివీర్ తిరిగి సాధారణ జీవితంలోకి వెళ్లే నిబంధన ఉండేది" అని కేంద్ర కేబినెట్ సమావేశం అనంతరం జరిగిన మీడియా సమావేశంలో చీఫ్ ఆఫ్ డిఫెన్స్ స్టాఫ్ జనరల్ ఎన్.ఎస్. రాజా సుబ్రమణి చెప్పారు.

"అయితే ఇప్పుడు మిగిలిన 75శాతం అగ్నివీరులకు ఈ పథకం కింద అదనంగా రెండేళ్ల సర్వీస్ వ్యవధి ఇస్తాము. ఈ కాలం పూర్తయిన తర్వాత నిర్దేశిత ప్రమాణాల ఆధారంగా ఎంపికైన అగ్నివీర్‌లు అందరినీ వారి ఇష్టం మేరకు సాయుధ దళాలలోకి రెగ్యులర్ సైనికులుగా చేర్చుకుంటారు" అని ఆయన వివరించారు.

కేబినెట్ నిర్ణయం తర్వాత, రక్షణ మంత్రి రాజ్‌నాథ్ సింగ్ ఇన్‌స్టాగ్రామ్‌లో ఒక పోస్ట్ పెట్టారు.

"నాలుగు లేదా ఆరేళ్ల సర్వీస్ పూర్తి చేసిన తర్వాత ఎంపిక ప్రమాణాలకు అనుగుణంగా ఉండే అగ్నివీర్‌లందరికీ రెగ్యులర్ సైనికులుగా చేరడానికి ఇది ఒక గొప్ప అవకాశాన్ని కల్పిస్తుంది" అని అందులో పేర్కొన్నారు.

"ఈ నిర్ణయం మన రక్షణ దళాలలో దీర్ఘకాలిక సంస్కరణలకు అనుగుణంగా ఉంది. భవిష్యత్తు సవాళ్లను ఎదుర్కొనేందుకు మరింత యువతతో కూడిన, దృఢమైన, సర్వసన్నద్ధమైన సైనిక బలగాన్ని తయారు చేయడమే దీని లక్ష్యం" అని రాజ్‌నాధ్ సింగ్ తన పోస్టులో రాశారు.

"ఇది కేవలం నియామక ప్రక్రియ కాదు. మారుతున్న యుద్ధ స్వభావానికి అనుగుణంగా భారత సైన్యాన్ని సిద్ధం చేయడానికి తీసుకున్న ఒక ముఖ్యమైన అడుగు" అని రక్షణ మంత్రి తెలిపారు.

భారత సైన్యంలోని మూడు విభాగాలు ఆర్మీ, ఎయిర్ ఫోర్స్, నేవీలలో జవాన్, ఎయిర్‌మ్యాన్, సెయిలర్ పోస్టుల భర్తీ కోసం రక్షణ మంత్రిత్వ శాఖ సుమారు నాలుగేళ్ల కిందట అగ్నిపథ్ పథకాన్ని ప్రారంభించింది.

ఈ స్కీమ్ ప్రకారం నాలుగేళ్ల తర్వాత మెరిట్ ఆధారంగా కేవలం 25శాతంమంది అగ్నివీర్‌లకు మాత్రమే శాశ్వత ఉద్యోగాలు ఇస్తారు.

రక్షణ శాఖ తాజా ప్రకటన తర్వాత అగ్నివీర్‌ లందరికీ పదవీ కాలాన్ని నాలుగేళ్ల నుంచి ఆరేళ్లకు పెంచారు.

మీ వయస్సు 17.5 సంవత్సరాల నుండి 21 సంవత్సరాల మధ్య ఉంటే మీరు ఈ పథకం కింద దరఖాస్తు చేసుకోవచ్చు.

లేదు. ఈ పథకం ఆఫీసర్ స్థాయి పోస్టుల కోసం కాదు. వారి కోసం ప్రత్యేక రిక్రూట్‌మెంట్ ప్రక్రియలు ఉన్నాయి.

అగ్నివీర్‌లు, త్రివిధ దళాల్లో పని చేసే సైనికుల పని పరిస్థితులతోపాటు అలవెన్సులన్నీ ఒకేలా ఉంటాయని త్రివిధ దళాలు స్పష్టం చేశాయి. రేషన్, యూనిఫాం, ప్రయాణానికి సంబంధించిన అన్ని అలవెన్సులను అగ్నివీర్‌లకు లభిస్తాయి.

అయితే అగ్నివీర్‌లకు కరవు భత్యం, మిలిటరీ సర్వీస్ పే లభించవు.

అగ్నివీర్‌లు సర్వీసులో ఉన్నంత కాలం ఆర్మీలో లభించే హెల్త్, క్యాంటీన్ సదుపాయాలు పొందుతారని సైన్యం ప్రకటించింది.

ఆరేళ్ల సర్వీస్ పూర్తి చేసిన తర్వాత వారికి ఎలాంటి పెన్షన్ లేదా గ్రాట్యుటీ లభించదు. అలాగే మాజీ సైనికులకు లభించే వైద్య, క్యాంటీన్ సదుపాయాలను కూడా వారు ఉపయోగించలేరు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)