మైక్రోసాఫ్ట్ అంతరాయం: 'పెద్ద టెక్నాలజీ సంస్థలపై అతిగా ఆధారపడుతున్నామా?'

ప్రపంచవ్యాప్తంగా సేవలకు అంతరాయం కలిగించిన సమస్య పూర్తిగా పరిష్కారమైందని మైక్రోసాఫ్ట్ ప్రకటించింది.

శనివారం తెల్లవారుజామున విడుదల చేసిన ప్రకటనలో, సమస్యకు కారణమైన లోపాన్ని సరిదిద్దినట్లు తెలిపింది. దీంతో అవుట్‌లుక్, టీమ్స్, కోపైలట్ వంటి సేవలను ఉపయోగిస్తున్న వినియోగదారులు ఇకపై ఎలాంటి అంతరాయం ఉండదని పేర్కొంది.

మైక్రోసాఫ్ట్ సేవల అంతరాయం.. కీలకమైన సేవల కోసం ప్రపంచం కొన్ని పెద్ద టెక్నాలజీ సంస్థలపైనే ఎంతగా ఆధారపడుతోందో అనే చర్చను తెరపైకి తీసుకొచ్చింది.

ఆటోమేటెడ్ తనిఖీల్లో భాగంగా కొన్ని సర్వర్లను ఆఫ్‌లైన్ చేయడంతో ఈ అంతరాయం ఏర్పడింది. దీంతో మిగిలిన సర్వర్లపై ట్రాఫిక్ భారం పెరిగి అవి కూడా సరిగా పనిచేయలేదు. ఈ ప్రభావం ఔట్‌లుక్ వంటి మైక్రోసాఫ్ట్ 365 సేవలపై పడింది.

ఇంజినీర్లు దశలవారీగా సేవలను పునరుద్ధరించడంతో దాదాపు ఒక రోజు సమయం పట్టింది. ఆధునిక సమాజంలో మైక్రోసాఫ్ట్ సేవలు ఎంతగా అంతర్భాగంగా మారాయో ఈ పరిణామం స్పష్టం చేసింది.

చిన్న వ్యాపారాల చార్టర్ ఎగ్జిక్యూటివ్ డైరెక్టర్ ఫ్లోరా హామిల్టన్ ఈ అంతరాయాన్ని ఒక "తీవ్రమైన హెచ్చరిక"గా అభివర్ణించారు. వ్యాపార కార్యకలాపాలు సజావుగా సాగేందుకు మైక్రోసాఫ్ట్ ఔట్‌లుక్ వంటి డిజిటల్ వ్యవస్థలపై సంస్థలు ఎంతగా ఆధారపడుతున్నాయో ఈ ఘటన గుర్తుచేసిందని అన్నారు.

"చాలా చిన్న, మధ్య తరహా సంస్థలకు ఈమెయిల్ అందుబాటులో ఉండటం అత్యంత కీలకం. వినియోగదారులు, సరఫరాదారులతో సంప్రదింపుల నుంచి ఆదాయం సమకూర్చుకోవడం వరకు ప్రతి పనికీ ఈమెయిల్ అవసరం" అని ఆమె వివరించారు.

ఈ అంతరాయం కేవలం వ్యాపార సంస్థలకే పరిమితం కాలేదు. ప్రపంచవ్యాప్తంగా పలు సంస్థలు, ప్రభుత్వ విభాగాలపైనా ప్రభావం చూపింది.

ప్రపంచవ్యాప్తంగా దాదాపు 43 కోట్ల మంది మైక్రోసాఫ్ట్ 365 సేవలను వినియోగిస్తున్నారు. 70కి పైగా దేశాల్లో ఈ సమస్యలు నమోదయ్యాయి.

ఈ అంతరాయం కారణంగా అమెరికా ప్రతినిధుల సభ, ఆస్ట్రేలియా నిఘా సంస్థల్లో ఈ మెయిల్ వ్యవస్థలు నిలిచిపోయాయి. సింగపూర్‌లో న్యాయస్థానాల కార్యకలాపాలు, భారత్‌లో విమానయాన సంస్థల సహాయక విభాగాల సేవలకూ ఆటంకం ఏర్పడింది.

ఈ సమస్యపై మైక్రోసాఫ్ట్ క్షమాపణలు చెప్పింది.

"ఈ ఘటన కారణంగా మా వినియోగదారులు, భాగస్వాములు ఎదుర్కొన్న ఇబ్బందులకు మనస్ఫూర్తిగా క్షమాపణలు చెబుతున్నాం" అని సంస్థ ప్రతినిధి తెలిపారు.

ఇది సైబర్ దాడి వల్ల గానీ, కృత్రిమ మేధ (ఏఐ) ఏజెంట్ వల్ల గానీ జరగలేదని మైక్రోసాఫ్ట్ స్పష్టం చేసింది. "నెట్‌వర్క్ సామర్థ్యాన్ని పెంచే అప్‌డేట్" సమయంలో ఏర్పడిన సాంకేతిక లోపమే దీనికి కారణమని తెలిపింది.

వినియోగదారుల నుంచి భారీగా డిమాండ్ ఉండటంతో సేవలను దశలవారీగా పునరుద్ధరించినట్లు మైక్రోసాఫ్ట్ సంస్థ ప్రతినిధి ఒకరు తెలిపారు.

"దీనివల్ల కొంత ఎక్కువ సమయం పట్టినప్పటికీ, సేవలను స్థిరంగా పునరుద్ధరించేందుకు ఇది దోహదపడింది" అని సంస్థ ప్రతినిధి వివరించారు.

'పరిష్కారానికి తీసుకున్న సమయం అసాధారణం'

శుక్రవారం నాటికి జపాన్ ప్రభుత్వం, ఫిలిప్పీన్స్ సుప్రీంకోర్టు, ఆస్ట్రేలియా నిఘా సంస్థతో పాటు ఉత్తర అమెరికాలోని రైలు సేవలు, ఆసుపత్రులు, న్యాయస్థానాల కార్యకలాపాలు కూడా ఈ అంతరాయం ప్రభావానికి గురయ్యాయి.

ప్రభుత్వాలు, వ్యాపార సంస్థలు, కీలక మౌలిక సదుపాయాల వ్యవస్థలు ఎంతగా టెక్నాలజీపై ఆధారపడుతున్నాయో, వాటిలో ఉన్న బలహీనతలు ఏమిటో ఈ అంతరాయం స్పష్టంగా బయటపెట్టిందని ఏఐ వ్యూహకర్త వాల్టర్ పాస్క్వారెల్లి బీబీసీతో అన్నారు.

"భవిష్యత్తులో ఏఐ అసిస్టెంట్లను మన ఈమెయిల్స్, క్యాలెండర్లు, ఫైళ్లతో అనుసంధానిస్తే.. ఇలాంటి అంతరాయం ప్రభావం మరింత విస్తరించే ప్రమాదం ఉంది" అని ఆయన హెచ్చరించారు.

ఇలాంటి అంతరాయాలు కొత్తేమీ కాకపోయినా, మైక్రోసాఫ్ట్ సేవలను తిరిగి సాధారణ స్థితికి తీసుకురావడానికి పట్టిన సమయం అసాధారణమని పలు ప్రముఖ టెక్నాలజీ సంస్థల్లో సాఫ్ట్‌వేర్ ఇంజినీర్‌గా పనిచేసిన గెర్గెలీ ఓరోజ్ అన్నారు.

ప్రస్తుతం ఈ అంతరాయానికి దారితీసిన కారణాలపై మైక్రోసాఫ్ట్ సమీక్ష చేపట్టింది. భవిష్యత్తులో ఇలాంటి సమస్యలు మళ్లీ తలెత్తకుండా తీసుకోవాల్సిన చర్యలకు ఈ సమీక్షలోని వివరాలు ఉపయోగపడతాయని సంస్థ తెలిపింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)