మీరు ఈ వెబ్సైట్ యొక్క టెక్స్ట్-ఓన్లీ వెర్షన్ను చూస్తున్నారు, ఇది తక్కువ డేటాను వినియోగిస్తుంది. అన్ని చిత్రాలు మరియు వీడియోలతో కూడిన వెబ్సైట్ యొక్క ప్రధాన వెర్షన్ను చూడండి.
టూత్‌బ్రష్‌ను మింగేసిన వ్యక్తి.. శస్త్ర చికిత్స లేకుండా బయటకు తీసిన డాక్టర్లు
- రచయిత, ఓంకార్ కరంబేల్కర్
- హోదా, బీబీసీ ప్రతినిధి
- ప్రచురణ
- చదివే సమయం: 5 నిమిషాలు
పళ్లు తోముకుంటున్నప్పుడు చేతిలోంచి జారిన టూత్‌బ్రష్ నేరుగా కడుపులోకి వెళ్లిపోతే వినడానికి వింతగా అనిపించవచ్చు. కానీ, నిజంగానే ఇలాంటి ఘటన జరిగింది.
మహారాష్ట్రలోని రాయ్‌గఢ్ జిల్లా పెణ్ తాలూకా శిర్వలి గ్రామానికి చెందిన రాజేంద్ర మాలుసరేకు ఇలాంటి అరుదైన అనుభవమే ఎదురైంది. దీంతో ఆయన ఆసుపత్రిలో చేరాల్సి వచ్చింది.
ఆటోరిక్షా డ్రైవర్‌ అయిన రాజేంద్ర మాలుసరే(50)కు మొదట నిర్వహించిన పరీక్షల్లో టూత్‌బ్రష్ కనిపించలేదు. అయితే, ఎండోస్కోపీలో అది కడుపులో ఇరుక్కున్నట్లు నిర్ధరణ అయింది.
19 సెంటీమీటర్ల పొడవున్న ఈ టూత్‌బ్రష్‌ను ఎలాంటి శస్త్రచికిత్స లేకుండానే ఎండోస్కోపీ ద్వారా బయటకు తీశారు. చికిత్స జరిగిన కొన్ని గంటల్లోనే ఆయన ఇంటికి తిరిగి వెళ్లారు.
ఎండోస్కోపీ అంటే కెమెరా అమర్చిన సన్నని, వంగే గొట్టాన్ని నోటి ద్వారా శరీరంలోకి పంపించే వైద్య ప్రక్రియ. దీని ద్వారా ఆహార నాళం, కడుపు, జీర్ణవ్యవస్థ లోపలి భాగాలను పరిశీలిస్తారు. జీర్ణవ్యవస్థలో ఇరుక్కున్న వస్తువులను కూడా శస్త్రచికిత్స అవసరం లేకుండా ఈ పద్ధతిలో బయటకు తీయవచ్చు.
బ్రష్ చేసుకుంటుండగా ఏం జరిగింది?
పెణ్‌కు చెందిన రాజేంద్ర మాలుసరే రోజూ మాదిరిగానే ఉదయం పళ్లు తోముకుంటున్నారు. ఆ సమయంలో పొరపాటున టూత్‌బ్రష్ గొంతు ద్వారా లోపలికి వెళ్లిపోయింది. దీంతో ఆయన సమీపంలోని ఓ వైద్యుడిని సంప్రదించారు.
ఎక్స్‌రేలో టూత్‌బ్రష్ కనిపించలేదు. దీంతో మరిన్ని పరీక్షల కోసం ఆయనను నవీ ముంబయిలోని ఓ ఆసుపత్రికి పంపించారు.
అక్కడ నిర్వహించిన ఎండోస్కోపీలో టూత్‌బ్రష్ మొత్తం కడుపులో ఇరుక్కున్నట్లు గుర్తించారు. సాధారణంగా కొందరు పొరపాటున పండ్ల గింజలను లేదా ఇతర చిన్న వస్తువులను మింగేస్తుంటారు. కానీ టూత్‌బ్రష్‌ను మింగేయడం చాలా అరుదైన ఘటన.
మెడికవర్ ఆసుపత్రికి చెందిన గ్యాస్ట్రోఎంటరాలజిస్ట్, హెపటాలజిస్ట్, ఎండోస్కోపీ నిపుణుడు డాక్టర్ రావుసాహెబ్ రాథోడ్ నేతృత్వంలోని వైద్య బృందం ఈ క్లిష్టమైన చికిత్సను విజయవంతంగా పూర్తి చేసింది.
19 సెంటీమీటర్ల టూత్‌బ్రష్
టూత్‌బ్రష్‌ను మింగిన మూడు నుంచి నాలుగు గంటల తర్వాత మాలుసరేకు కడుపులో స్వల్పంగా నొప్పి మొదలైంది. ఎండోస్కోపీ పరీక్షలో 19 సెంటీమీటర్ల పొడవున్న టూత్‌బ్రష్ ఆయన కడుపులో ఉన్నట్లు నిర్ధరణ అయింది.
టూత్‌బ్రష్ లాంటి పొడవైన, గట్టిగా ఉండే వస్తువులు జీర్ణవ్యవస్థలో సహజంగా బయటకు వచ్చే అవకాశం చాలా తక్కువని వైద్యులు తెలిపారు.
ఇలాంటి వస్తువులు ఆహార నాళం లేదా జీర్ణవ్యవస్థలోని ఇరుకైన భాగాల్లో ఇరుక్కుపోవచ్చు. దీంతో అంతర్గత గాయాలు, జీర్ణవ్యవస్థలో అడ్డంకులు ఏర్పడటం, పేగులకు రంధ్రాలు పడటం వంటి తీవ్రమైన సమస్యలు తలెత్తవచ్చు.
ఎండోస్కోపీ ద్వారా చేసిన చికిత్స దాదాపు 30 నిమిషాల పాటు కొనసాగింది. టూత్‌బ్రష్ కడుపులో అడ్డంగా ఇరుక్కుపోయింది. దాన్ని పట్టుకుని ఆహార నాళంలోని మలుపుల గుండా సురక్షితంగా బయటకు తీయడం వైద్యులకు పెద్ద సవాలుగా మారింది.
చికిత్స సమయంలో టూత్‌బ్రష్ కడుపు, ఆహార నాళం కలిసే ప్రాంతంలో ఇరుక్కుపోయింది. ఆ తర్వాత గొంతులోని ఇరుకైన భాగం నుంచి బయటకు తీసుకురావాల్సి రావడంతో మరింత జాగ్రత్త అవసరమైంది. పలుమార్లు ప్రయత్నించిన తర్వాత వైద్యులు ఎలాంటి శస్త్రచికిత్స లేకుండా టూత్‌బ్రష్ మొత్తాన్ని నోటి ద్వారా బయటకు తీయగలిగారు.
టూత్‌బ్రష్‌ను బయటకు తీసిన తర్వాత మరోసారి ఎండోస్కోపీ నిర్వహించారు. ఆహార నాళం లేదా జీర్ణవ్యవస్థలో ఎలాంటి గాయాలు కాలేదని నిర్ధరించుకున్నారు. కొంతసేపు వైద్యుల పర్యవేక్షణలో ఉంచిన తర్వాత రోగి ఆరోగ్య పరిస్థితి సాధారణంగా ఉన్నట్లు గుర్తించారు. దీంతో అదే రోజు ఇంటికి వెళ్లేందుకు అనుమతించారు.
అయితే, మాలుసరేకు మొదట ఎక్స్‌రే తీసినప్పుడు అందులో టూత్‌బ్రష్ ఎందుకు కనిపించలేదని డాక్టర్ రావుసాహెబ్ రాథోడ్‌ను బీబీసీ ప్రశ్నించింది.
"ప్లాస్టిక్ వస్తువులు సాధారణంగా ఎక్స్‌రే చిత్రాల్లో స్పష్టంగా కనిపించవు. ఎముకలు, లోహపు వస్తువులు మాత్రమే ఎక్స్‌రేలో తరచుగా స్పష్టంగా కనిపిస్తాయి" అని రాథోడ్ వివరించారు.
"అందుకే ఎక్స్‌రే ఫలితాలను మాత్రమే ఆధారంగా చేసుకుని శరీరంలోకి ఏ వస్తువూ వెళ్లలేదని నిర్ధరించలేం. ఏదైనా వస్తువును మింగినట్లు రోగి కచ్చితంగా చెబితే లేదా ఆ తర్వాత ఇబ్బందులు ఎదుర్కొంటే మరిన్ని పరీక్షలు చేయడం అవసరం. ఈ రోగి విషయంలోనూ ఎండోస్కోపీ చేసిన తర్వాతే టూత్‌బ్రష్ మొత్తం కడుపులో ఉన్నట్లు తెలిసింది. ఇలాంటి ఘటనల్లో రోగి గత వైద్య చరిత్ర, లక్షణాలు చాలా ముఖ్యం" అని ఆయన చెప్పారు.
ఎండోస్కోపీనే ఎందుకు ఎంచుకున్నారు?
రోగిని పరీక్షించిన తర్వాత టూత్‌బ్రష్ కడుపులో ఉన్నట్లు స్పష్టమైందని డాక్టర్ రాథోడ్ తెలిపారు. దీంతో ఎండోస్కోపీ ద్వారా దాన్ని బయటకు తీయాలని నిర్ణయించినట్లు చెప్పారు.
"ఎండోస్కోపీ ప్రక్రియలో ఓ సన్నని, వంగే గొట్టాన్ని నోటి ద్వారా శరీరంలోకి పంపిస్తారు. దాని చివర కెమెరా ఉంటుంది. దీని సాయంతో జీర్ణవ్యవస్థ లోపలి భాగాలను పరిశీలించవచ్చు. ప్రత్యేక పరికరాల సాయంతో లోపల ఇరుక్కున్న వస్తువులను పట్టుకుని బయటకు తీయవచ్చు. ఈ కేసులో ఎండోస్కోప్ చివర ప్రత్యేక పరికరాన్ని అమర్చి టూత్‌బ్రష్ ఒక చివరను పట్టుకున్నాం" అని వివరించారు.
"రోగి ఆరోగ్య పరిస్థితి, టూత్‌బ్రష్ ఇరుక్కున్న ప్రదేశాన్ని పరిశీలించిన తర్వాత ఎండోస్కోపీ ద్వారా చికిత్స చేయడం సాధ్యమని భావించాం. అందుకే శస్త్రచికిత్స అవసరం రాలేదు. అయితే, ఇలాంటి నిర్ణయం తీసుకునే ముందు వస్తువు ఎక్కడ ఉంది, జీర్ణవ్యవస్థ పరిస్థితి ఎలా ఉంది, రోగి ఆరోగ్య పరిస్థితి ఏమిటనే అంశాలను పరిశీలించడం అవసరం" అని డాక్టర్ తెలిపారు.
టూత్‌బ్రష్‌ను బయటకు తీయడం ఎంత కష్టమైంది?
టూత్‌బ్రష్‌ను నోటి ద్వారా బయటకు తీసే ప్రయత్నంలో వైద్య బృందం అనేక ఇబ్బందులు ఎదుర్కొంది. ఎండోస్కోప్ చివర అమర్చిన ప్రత్యేక పరికరంతో టూత్‌బ్రష్ ఒక చివరను పట్టుకున్నారు. అయితే, అది కడుపు, ఆహార నాళం కలిసే ప్రాంతంలో ఇరుక్కుపోయింది.
రోగి శరీర భంగిమను మార్చుతూ పలుమార్లు ప్రయత్నించిన తర్వాత దాన్ని ముందుకు కదిలించారు. ఆ తర్వాత గొంతులోని ఇరుకైన భాగంలోనూ అది ఇరుక్కుంది. టూత్‌బ్రష్ వంగే అవకాశం లేకపోవడంతో ఈ ప్రక్రియను అత్యంత జాగ్రత్తగా పూర్తి చేయాల్సి వచ్చిందని వైద్యులు తెలిపారు.
"టూత్‌బ్రష్‌ను బయటకు తీసిన తర్వాత మరోసారి ఎండోస్కోపీ చేశాం. ఈ పరీక్షలో ఆహార నాళం పైభాగం, కింది భాగాన్ని పరిశీలించాం" అని రాథోడ్ చెప్పారు.
"పరీక్షల్లో ఎలాంటి తీవ్రమైన గాయాలు కనిపించలేదు. ఆ తర్వాత కొంతసేపు రోగిని వైద్యుల పర్యవేక్షణలో ఉంచాం. ఆయన ఆరోగ్య పరిస్థితి సాధారణంగా ఉందని నిర్ధరించుకున్న తర్వాత మూడు నుంచి నాలుగు గంటల్లోనే ఇంటికి వెళ్లేందుకు అనుమతించాం" అని వివరించారు.
టూత్‌బ్రష్ లోపలికి ఎలా వెళ్లింది?
ఈ ఘటనపై రాజేంద్ర మాలుసరేను బీబీసీ సంప్రదించి, ఆ రోజు ఏం జరిగిందని అడిగింది.
"పళ్లు తోముకున్న తర్వాత టూత్‌బ్రష్‌తో నాలుకను శుభ్రం చేయడం నాకు అలవాటు. అలా చేస్తున్నప్పుడు బ్రష్ చేతిలోంచి జారి లోపలికి వెళ్లిపోయింది. ఆ సమయంలో గొంతుకు కూడా గాయమైంది. దీంతో బ్రష్ గొంతులోనే ఇరుక్కుపోయిందనుకున్నాను. కానీ, తర్వాత అది కడుపులోకి వెళ్లిపోయిందని తెలిసింది" అని రాజేంద్ర చెప్పారు.
"మొదట బ్రష్ లోపల ఇరుక్కుపోవడంతో శ్వాస తీసుకోవడంలో ఇబ్బంది వస్తుందేమోనని భయపడ్డాను. కానీ వెంటనే వైద్యుడి దగ్గరకు వెళ్లాను. పెణ్‌లో చికిత్స సాధ్యం కాకపోవడంతో నవీ ముంబయిలోని ఖార్ఘర్‌కు వెళ్లాను. శస్త్రచికిత్స చేయాల్సి వస్తుందనుకున్నా. కానీ ఎండోస్కోపీ ద్వారా చికిత్స చేశారు. అదే రోజు నన్ను ఇంటికి పంపించారు" అని వివరించారు.
వైద్యుల సూచనలేంటి?
"పళ్లు తోముకునేటప్పుడు తొందరపడకూడదు. నోటిలో టూత్‌బ్రష్ పెట్టుకున్నప్పుడు మాట్లాడటం, నవ్వడం లేదా ఇతర పనుల్లో నిమగ్నం కావడం చేయకూడదు. ముఖ్యంగా టూత్‌బ్రష్‌ను నోటిలో మరీ లోతుగా పెట్టి పళ్లు తోమకూడదు" అని డాక్టర్ రాథోడ్ సూచించారు.
"పొరపాటున టూత్‌బ్రష్ లేదా మరేదైనా పెద్ద వస్తువును మింగేస్తే వెంటనే ఆసుపత్రికి వెళ్లాలి" అని చెప్పారు.
"ఇలాంటి పరిస్థితుల్లో స్వయంగా వాంతి చేసుకోవడానికి ప్రయత్నించకూడదు. ఆ వస్తువును కిందికి పంపించాలనే ఉద్దేశంతో ఆహారం తినకూడదు. ఇలా చేయడం వల్ల ఆహార నాళానికి గాయం కావచ్చు. లేదంటే ఆ వస్తువు మరింత గట్టిగా ఇరుక్కుపోవచ్చు" అని హెచ్చరించారు.
"ప్రారంభంలో నొప్పి తక్కువగా ఉన్నప్పటికీ, అంతర్గత గాయాలు లేదా ఇతర సమస్యలు తలెత్తే అవకాశాన్ని కొట్టిపారేయలేం. అందుకే సమస్యను సకాలంలో గుర్తించి సరైన చికిత్స తీసుకోవడం చాలా ముఖ్యం" అని డాక్టర్ రాథోడ్ సూచించారు.
(బీబీసీ కోసం కలెక్టివ్ న్యూస్‌రూమ్ ప్రచురణ)
(బీబీసీ తెలుగును వాట్సాప్‌, ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)