దలేర్ మెహందీకి అనుపమ్ ఖేర్ బాసట, దలేర్ మెహిందీకి అనుపమ్ ఖేర్ బాసట
ఫొటో సోర్స్, Prodip Guha/Getty Images
ఉత్తరాఖండ్‌లోని తెహ్రీలో జరిగిన ఓ ప్రదర్శనలో రేగిన వివాదానికి సంబంధించి పంజాబ్ గాయకుడు దలేర్ మెహిందీకి బాలీవుడ్ నటుడు అనుపమ్ ఖేర్, రాపర్ బాద్షా అండగా నిలిచారు.
ఈ ప్రదర్శన జరుగుతుండగా ఉత్తరాఖండ్ మంత్రి సుబోధ్ ఉనియాల్ వేదికపైకి వచ్చి తాగి పాడుతున్నావంటూ దలేర్ మెహిందీ పాటను ఆపేశారు. ఈక్రమంలో దలేర్ మెహిందీకి మద్దతుగా అనుపమ్ ఖేర్ ఓ వీడియో రిలీజ్ చేశారు. అలాగే సినీ పరిశ్రమ కూడా బాసటగా నిలవాలని కోరారు.
‘‘నేను ఈ మధ్య ఓ వీడియో చూశాను. అందులో దలేర్ మెహిందీజీ వేదికపై పాడుతుండగా, ఎవరో మంత్రి వేదికపైకి వచ్చి ఆయన గురించి కోపంగా మాట్లాడుతూ ఏదేదో చెప్పారు. నేను అక్కడ లేను. అందుకే దీని గురించి నాకు పెద్దగా సమాచారం లేదు. కానీ దలేర్ జీ గత పాతిక ముప్పై సంవత్సరాలుగా తెలుసు. ఆయన మద్యం సేవించరు. నేను కలిసిన మంచి మనుషులలో ఆయన ఒకరు’’ అని అనుపమ్ ఖేర్ చెప్పారు.
‘దలేర్‌జీ ఆరోగ్యం గత రెండుమూడేళ్లుగా సరిగా లేదు. అయినా ఆ సంస్థతో ఏదైనా కమిట్‌మెంట్ ఉండటం వల్ల ఆయనీ కార్యక్రమాన్ని తిరస్కరించలేకపోయి ఉండొచ్చు. బహుశా ఆయన కేవలం పెదాలు మాత్రమే కదిపి ఉండొచ్చు. కానీ జరిగినదానిపై చాలా బాధపడ్డా. ఎవరూ కూడా అలా మాట్లడకూడదు. ప్రత్యేకించి బహిరంగ వేదికలపై. మన పరిశ్రమలోనివారు అందరూ దీనిపై మాట్లాడి ఓ నిర్ణయం తీసుకోవాలి’’ అని అనుపమ్ ఖేర్ చెప్పారు.
‘దలేర్‌జీ మీ మంచితనంపైనా, మీ వృత్తిధర్మంపైనా నాకు పూర్తి నమ్మకం ఉంది. మీరు త్వరలోనే కోలుకుంటారని ఆశిస్తున్నా. ఇలాంటి ఘటన జరగడంపై విచారం వ్యక్తం చేస్తున్నా’ అని చెప్పారు.
మరోపక్క దలేర్ మెహిందీ మద్యం తాగలేదని, ఇటీవల ఆయనకు ఆపరేషన్ జరగడం వల్ల ఆయన ఆరోగ్యం సరిగా లేదని దలేర్ సోదరుడు మికా సింగ్ స్పష్టం చేశారు.
