Yadda kafafen yaɗa labaran Iran ke yi wa Trump shaguɓe bayan faɗuwu zaɓe

Kafafen yada labaran Iran sun riƙa bayyana sakamakon zaɓen Amurka, kuma kowacce kafa da irin yadda take bayyana ra'ayinta game da shi.

Wasu daga cikin kafafen sun bayyana sakamakon a matsayin "babban ruɗani, rikici da kuma nuna wa juna yatsa, wanda hakan ya samo asali daga batun yaƙin Iran".

Jaridu masu ra'ayin riƙau na bayyana sauyin da aka samu a zaɓen a matsayin "sauyin hannun shugabanci a Amurka' sannan kuma wata alama ta karin rarrabuwar kai a tsakanin ƴan jam'iyyar Republican ta Donald Trump.

A ɓangare ɗaya kuma, jam'iyyun masu ra'ayin ƴan mazan jiya sun riƙa bayyana yadda ake samun ɓaraka a cikin gwamnatin Amurka, inda wasu ke neman a yi sulhu da gwamnatin Iran, wasu kuma ke neman a ci gaba da yaƙi, sai kuma wadanda ke neman a ci gaba da sanya wa Iran matsi na tattalin arziƙi.

Haka nan wasu daga cikin jaridun na Iran sun riƙa wallafa cewa shugabar ma'aikata ta fadar White House Susie Wiles ta ajiye muƙaminta, kuma an nada Stephen Miller a madadinta.

Haka nan kuma ƙarin matsi kan sakataren tsaro na Amurka Pete Hegseth da kuma tambayoyi game da rawar da ya taka a yaƙin Iran ta yi tasiri.

Haka nan wata jaridar ta bayyana yadda ake ɗora ayar tambaya kan rawar da mutane irin su Admiral Brad Cooper, kwamandan cibiyar tsaron Amurka ta CENTCOM, da Janar Dan Kane, shugaban dakarun Amurka suka taka.

Mataimakin shugaban Amurka JD Vance ya fitar da wata sanarwa yana ɗora laifin faɗuwar jam'iyyar Republican a kan yaƙin Iran.

'Yaƙin ya fara ne a White House'

Jaridar masu ra'ayin mazan jiya ta Keynes ta rubuta cewa "yaƙin ya fara ne a Fadar White House", tana mai cewa "jami'an Amurka na yin murabus ɗaya bayan ɗaya."

Jaridar ta bayyana yanayin da ke cikin White House a matsayin wanda "ke cike da matsananciyar takun-saƙa da fushi."

Ta danganta hakan da abin da ta kira "mummunan koma baya na tarihi" da ta ce Iran ta jefa wa shugaban Amurka Donald Trump da jam'iyyar Republican.

A cewar jaridar, masu ra'ayin tsattsauran ra'ayi na ganin cewa yaƙin da aka yi da Iran ne ya haifar da rashin nasarar da jam'iyyar Republican ta fuskanta a zaɓen tsakiyar wa'adi.

Jaridar ta kuma yi nuni da murabus da dama da aka samu a Ma'aikatar Shari'a ta Amurka, tare da ambaton naɗin Stephen Miller a matsayin wani muhimmin jigo.

Ta ce Miller, wanda a baya ya kasance mai goyon bayan yaƙin da ƙarfi, yanzu ana cewa yana daga cikin masu fafutukar ganin an kawo ƙarshen rikicin.

'Trump ya bayar da damar sauya mulki a Amurka'

Jaridar Jam-e-Jam, wadda ke da alaƙa da kafafen yaɗa labarai na gwamnati a Iran, ta fito da babban kanun labari mai cewa: "White House na cikin ruɗani kan rikicin cikin gida."

A nata ɓangaren, jaridar mai ra'ayin tsattsauran ra'ayi ta Jawan ta rubuta cewa: "Trump na shirin sauya tsarin ƙarfin Amurka!"

Jaridar ta yi amfani da kalaman jami'an Amurka na baya-bayan nan game da yiwuwar sauya gwamnati a Iran a matsayin martani ga Washington.

Haka kuma, Jawan ta ambaci kalaman da aka danganta wa Trump, inda ya amince cewa za a iya samun sauye-sauye a cikin tawagarsa bayan shan kaye a zaɓe.

Ita ma jaridar Watan-e-Emroz, wadda ke da ra'ayin tsattsauran ra'ayi, ta yi nazari kan takun-saƙar siyasar da ke gudana a Washington, inda 'yan Republican masu adawa da yaƙi da kuma masu goyon bayan yaƙi ke ƙoƙarin yin tasiri kan dabarun Trump.

A cewar jaridar, sake buɗe mashigar Hormuz ya zama babban abin da gwamnatin Amurka ta fi mayar da hankali a kai.

Ta ce manufar hakan ita ce rage farashin man fetur da kuma dawo da goyon bayan jama'a.

Rabuwar kai a tawagar Trump

Jaridar masu ra'ayin mazan jiya ta Agah ta fito da babban kanun labari mai cewa: "Hannayen Masu Laifi Sun Zama Fanko."

Jaridar ta ce yanzu sakamakon yaƙin da kuma rashin nasara a zaɓe sun fara bayyana a fili.

Ita kuwa jaridar Arman-e-Milli, mai goyon bayan masu neman sauyi, ta bayar da rahoton abin da ta kira "saɓani" a cikin fadar White House.

A cewar jaridar, tsadar da rikicin Iran ya haifar ta raba sansanin Trump gida-gida.

Jaridar ta ce akwai manyan ƙungiyoyi uku masu ra'ayi mabambanta a cikin gwamnati.

Ƙungiya ta farko na ganin cewa ya kamata a sake buɗe mashigin ruwan Strait of Hormuz ta hanyar tattaunawa da sasanta rikici.

Ƙungiya ta biyu kuwa na goyon bayan komawa ɗaukar matakan soja, yayin da ta uku ke son ci gaba da matsin tattalin arziki da takunkumai kan Iran.

A cewar jaridar, waɗannan bambance-bambancen ra'ayi na nuna irin ƙalubalen da gwamnatin Trump ke fuskanta wajen tsara matakin da za ta ɗauka kan Iran.

Har yanzu Trump bai koyi darasi ba

Jaridar masu ra'ayin mazan jiya ta Sazandegi ta fito da tambayar: "Wa za a kora?"

Jaridar ta bayyana yaƙin da aka yi da Iran a matsayin wani rikicin siyasa da ya dabaibaye Amurka.

A cewarta, wannan rikici na iya jefa makomar siyasar wasu manyan jami'ai cikin haɗari, ciki har da Pete Hegseth, J.D. Vance, da kuma wasu waɗanda ake hasashen za su nemi shugabancin ƙasa a zaɓen shekarar 2028.

Ita ma jaridar Shargh ta rubuta cewa sabbin nauyin da aka ɗora wa Stephen Miller, a daidai lokacin da ake fuskantar sabani kan manufofin Iran, sun haifar da tambayoyi kan ko tasirin Vance a cikin gwamnati zai iya raguwa.

Bayan da jam'iyyar Republican ta fuskanci rashin nasara a zaɓen tsakiyar wa'adi, Trump ya ƙara bai wa Stephen Miller iko da alhakin jagorantar wasu muhimman tsare-tsaren gwamnatinsa.

Hakan dai ya zo ne duk da cewa masu jefa ƙuri'a sun nuna rashin amincewa da waɗannan manufofi, a cewar jaridar Tehran Times ta harshen Ingilishi, wadda ke da alaƙa da Hukumar Yaɗa Addinin Musulunci ta gwamnatin Iran.

Jaridar ta bayyana Miller a matsayin ɗan siyasa mai tsattsauran ra'ayi, tana mai cewa manufofinsa sun sa masu zaɓe da dama suka juya masa baya.

A cewar Tehran Times, ba wa Miller wannan babban matsayi yana nuna cewa Trump ya yi kamar "bai koyi wani darasi ba" daga sakamakon da ya fuskanta a zaɓe.