Madaxweyne Trump oo sheegay in laba toddobaad gudahood Washington go’aan ka gaarayso arrinta Iiraan

Tebin toos ah

1. 6 Nofembar 2026Garsoore Federaal ah oo hakiyey qorshe Trump doonayey in la bilaabo

   

   Xigashada Sawirka, Reuters

   Garsoore federaal ah ayaa si ku-meel-gaar ah u hakiyay dhismaha taallada weyn ee qaansada u eg, ee 'Guusha" oo uu Madaxweynaha Mareykanka Donald Trump doonayo in laga dhiso caasimadda dalkaas.

   Garsooraha Maxkamadda Degmada Mareykanka Tanya Chutkan ayaa go’aamisay in shaqada dhismaha taallada laga hakiyo muddo 14 maalmood ah, ka hor inta aan la bilaabin. Maamulka Trump ayaa horay u sheegay in dhismaha uu bilaaban karo toddobaadkan.

   Horaantii Khamiistii, Guddiga Qorsheynta Caasimadda Qaranka (NCPC) ayaa 8 cod iyo 4 ku ansixiyay dhismaha taallada oo la qorsheeyay, taas oo dhererkeedu noqonayo 250 fiit (72 mitir).

   Xubnaha guddiga ee uu Trump magacaabay ayaa sheegay in taalladu ay noqon doonto xusuus iyo maamuus ku habboon taariikhda Mareykanka iyo halyeeyadii dagaallada. Hase yeeshee, dadka ka soo horjeeda mashruuca ayaa ku doodaya in dhismaheedu uu qarin doono muuqaalka Qabuuraha Qaranka Arlington, oo ay ku aasan yihiin kumannaan askari iyo shaqaale ciidan oo Mareykan ah.

   Ansixinta mashruuca ee fiidnimadii Khamiista ayaa timid kaddib ku dhowaad sagaal saacadood oo ay dadweynuhu aragtidooda ka dhiibanayeen.

   “ Aqalka Cad wuxuu soo dhoweynayaa go’aanka Guddiga Qorsheynta Caasimadda Qaranka ee si buuxda loogu ansixiyay qorshaha taariikhiga ah ee Madaxweyne Trump, kaas oo ah dhismaha taallo weyn oo aad loogu baahan yahay magaalada Washington DC,” ayuu afhayeen u hadlay Aqalka Cad u sheegay BBC-da.

   Weli lama oga goorta uu bilaaban karo dhismaha, maadaama ay jiraan dacwado maxkamadeed oo dhowr ah oo lagu doonayo in lagu hor istaago mashruuca.

2. 6 Nofembar 2026Siyaasigii waday aqoonsiga Somaliland oo waayey kursigiisii Kongareska. Sidee doorashadan u saameysay siyaasiyiinta kale ee taageera ictiraafka Somaliland?

   Ayadoo xisbiga dimoqaraadiga ee Maraykanku uu ku guulaystay aqlabiyadda labada aqal ee uu ka kooban yahay Koongareeska, ayey arrintaasi siyaabo kala duwan u saameysay saaxibada siyaasadeed ee Somaliland ay ku leedahay aqalka iyo guud ahaan siyaasadda Maraykanka.

   Shaqsiga ugu weyn ee meesha ka baxay oo kursigiisii looga adkaaday waa Scott Perry, ninkii miiska soo saaray 12 Juun 2025, xeerka qabyo qoraalka ah ee la yiraahdo 'xeerka madax banaanida Jamhuuriyadda Somaliland – H.R. 3992' si loo meel mariyo. Ilaa hadda Koongareesku ma uusan ansixin xeerkaas qabyo qoraalka ah.

   Perry waa mudane ka tirsanaa xisbiga Jamhuuriga oo laga soo doortay gobolka Pennsylvania, waxaana ka guulaysatay Janelle Stelson oo ka tirsan xisbiga Dimoqaraadiga.

   Hadal qoraal ah oo uu soo saaray markii laga guulaystay ka dib ayuu ku yiri Scott Perry "Anigoo u adeegayey dadka bartamaha-koofureed, Pennsylvania waxay ka mid ahayd sharafta ugu weyn noloshayda. Waxaan si aan kala go 'lahayn uga shaqeynay sidii aan isbeddel u sameyn lahayn, aan u keeni lahayn natiijooyin macno leh, aan u horumarin lahayn nolosha, hab-nololeedka, iyo mustaqbalka, aan u ilaalin lahayn aasaaska Mareykanka, iyo inaan difaacno xorriyadda uu Ilaahay ina siiyay. Doorashadani kordhinaysaa baahida loo qabo in la dagaallamo si loo ilaaliyo loona difaaco Qarankeenna iyo hab-nololeedka Mareykanka. Waxaan koongareska ku matalay qiyamkeenna Mareykanka intii karaankeyga ah mana qabo wax qoomamo ah. In kasta oo natiijooyinka xalay aysan ahayn wixii aan rajeynaynay, haddana waxaan ixtiraamayaa go'aanka Cod bixiyeyaasha ee Degmada 10-aad, iyo wareejinta nabdoon ee awoodda oo ah tan ugu muhiimsan Jamhuuriyaddeenna".

   Janelle Stelson waxay ku guuleysatay 55% codadkii la tiriyey, halka uu Scott Perry helay 45%.

   Halkan ka sii akhri sheekada oo dhamaystiran

3. 6 Nofembar 2026Axmed Khaatami, oo khudbadii Jimcaha ka hadlay doorashadii Maraykanka, digniina diray

   

   Xigashada Sawirka, Tasnim

   Axmed Khaatami, oo ah imaamka ku-meelgaarka ah ee salaadda Jimcaha ee magaalada Tehran, ayaa doorashadii xilliga dhexe ee Mareykanka ku tilmaamay guuldarro soo gaartay xisbiga Jamhuuriga. Hase yeeshee, waxa uu uga digay dadka reer Iran inaysan u qaadan in xisbiga Dimuqraadigu uu siyaasad ka dabacsan ku wajihi doono Jamhuuriyadda Islaamiga ah.

   Waxa uu sheegay in doorashada xilliga dhexe ee Mareykanka ay Jamhuuriyiintu ku guuldarreysteen, ayna lumiyeen labada aqal ee kala ah Aqalka Wakiillada iyo Senate-ka.

   “Waxaan idiin sheegayaa in Dimuqraadiyiinta iyo Jamhuuriyiintu isku mid yihiin. Waxay la mid tahay maahmaahda oranaysa. Waxyeello aan ka yarayn tan Jamhuuriyiinta ayaan kala kulannay Dimuqraadiyiinta,” ayuu yiri.

   Isaga oo xusay madaxweynihii hore ee Mareykanka Barack Obama iyo heshiiskii nukliyeerka Iran ee JCPOA ee la gaaray sannadkii 2015, ayuu carrabka ku adkeeyay in maamulladii Dimuqraadiga ahaa ee Mareykankuba ay raaceen siyaasad lagu xaddidayay barnaamijka nukliyeerka Iran.

   Axmed Khaatami ayaa yiri: “Maalmahan Obama waxa uu sheegay inuu wadaxaajood ku soo saaray Iran 11 tan oo walaxda yellowcake ah. Isaga laftiisa ayaa qiraya arrintaas. Halka Trump uu awoodi waayay inuu Iran kala baxo 400 oo kiilo oo yuraaniyam la tayeeyay ah. In la rajo wanaagsanaado oo la yiraahdo Dimuqraadiyiintu way ka dabacsan yihiin, waxaan mar kale leeyahay: mana danaynayno xisbigii talada Mareykanka qabta.”

   Axmed Khaatami ayaa sidoo kale guuldarrada Benjamin Netanyahu ee ku aaddan inuu aqlabiyad ka helo baarlamaanka Israa'iil la barbar dhigay guuldarrada Jamhuuriyiinta, isaga oo ku tilmaamay arrintaas calaamad muujinaysa “daciifnimada” mucaaradka Jamhuuriyadda Islaamiga ah.

   Maalintii lagu dhawaaqay natiijooyinka doorashada xilliga dhexe ee Mareykanka, waxaa la baahiyay farriin qoraal ah oo loo nisbeeyay Mojtaba Khamenei, taas oo uu ku sheegay in rajada laga qabo in siyaasadda Mareykanka ee ku wajahan Iran ay isbeddeli doonto ay tahay “qalad weyn”.

4. 6 Nofembar 2026Dunidu ma dhammaan doontaa 13-ka Nofeembar 2026? Saadaal hore oo mar kale hadal-haynteedu soo cusboonaatay

   

   Xigashada Sawirka, Getty Images

   Marka ay taariikhdani soo dhowaanayso, cabsida laga qabo "dhammaadka dunida" ayaa mar kale si weyn looga hadal hayaa baraha bulshada iyo warbaahinno kala duwan.

   Taariikhdani waxay la xiriirtaa daraasad cilmiyeed oo la daabacay 66 sano ka hor, taas oo lagu qiimeynayay mustaqbalka tirada dadka ku nool dhulka.

   Daraasaddan waxaa qoray saddex cilmi-baare, waxaana 4-tii Nofeembar 1960 lagu daabacay majaladda Maraykanka ee Science. Cinwaankeedu wuxuu ahaa: "Maalinta Qiyaamaha: Jimce, 13-ka Nofeembar".

   Cilmi-baarayaashu waxay daraasaddooda ku sheegeen in haddii tirada dadka dunidu ay ku sii korodho isla xawaaraha ay ku arkeen xogta ku dhowaad 2,000 oo sano, marka la eego xisaabtooda saadaasha ah, tirada bani'aadamku ay bisha Nofeembar 2026 aragti ahaan gaari doonto wax "aan xad lahayn".

   Halkani ka sii akhri

5. 6 Nofembar 2026Trump oo shaaciyey waqtiga uu siinayo arrinta Iiraan

   

   Xigashada Sawirka, Reuters

   Madaxweynaha Mareykanka Donald Trump ayaa sheegay in Washington ay labada toddobaad ee soo socda ku go’aamin doonto inay tallaabooyin dheeraad ah ka qaaddo Iran iyo in kale, ama ay ansixiso heshiis suuragal ah oo lala gaaro Tehran.

   Isaga oo su’aalo uga jawaabayay wariyeyaasha Aqalka Cad, ayuu Trump sheegay in, iyada oo aan loo eegin faahfaahinta hindisayaasha ay Iran ka fiirsanayso, hal arrin ay caddahay: “Iran ma heli doonto hub nukliyeer ah.” Waxa uu intaas ku daray in Tehran aysan qaadi doonin tallaabooyin waaweyn iyada oo aan oggolaansho ka haysan Mareykanka.

   Trump ayaa ku andacooday in Mareykanku toddobadii bilood ee la soo dhaafay uu gaaray dhammaan yoolalkiisii waaweynaa ee la xiriiray Iran.

   “Waxaad dhowaan ogaan doontaan go’aanka aan ka gaarno Iran,” ayuu yiri.

   Si kastaba ha ahaatee, waxa uu sheegay inuusan doonayn in Iran la burburiyo, balse uu intaas ku daray: “Haddii ay lagama maarmaan noqoto, waxaa laga yaabaa inaan ku qasbanaanno.”

   Dhanka kale, Cali Baqiri Kaani, oo ah ku-xigeenka madaxa Golaha Sare ee Amniga Qaranka Iran, ayaa wareysi uu siiyay telefishinka dowladda ku sheegay in Tehran aysan ku qanacsanaan doonin “ballanqaadyo qoraal ah” oo keliya, isla markaana ay doonayso in Mareykanku qaado tallaabooyin wax-ku-ool ah ka hor inta aan wax horumar ah laga gaarin diblomaasiyad cusub.

   Sheekooyinka kale ee aad sii akhrin karto:

   Dunidu ma dhammaan doontaa 13-ka Nofeembar 2026? Saadaal hore oo mar kale hadal-haynteedu soo cusboonaatay

   Haweenka Kenya oo looga digay isticmaalka khaldan ee daawada Cetirizine

   Shirkado uu leeyahay maalqabeenka Elon Musk oo si weyn hoos ugu dhacay kadib doorashooyinkii Mareykanka

6. 6 Nofembar 2026Iiraan oo war soo saartay ka dib hadalkii Trump sheegay

   

   Xigashada Sawirka, EPA

   Cali Baqiri Kaani, oo ah ku-xigeenka xoghayaha Golaha Sare ee Amniga Qaranka Iran, ayaa sheegay in Iran aysan ku qanacsanaan doonin “ballanqaadyo qoraal ah” oo ka yimaadda Mareykanka ka hor inta aysan gelin marxalad cusub oo diblomaasiyadeed.

   Warbaahinta Iran ayaa sheegtay in Cali Baqiri Kaani uu shardi u dhigay in la arko tallaabooyin wax-ku-ool ah oo Mareykanku u qaado nabadda Iran, ka hor inta aan la bilaabin marxaladdan cusub ee diblomaasiyadda.

   Waxa uu sidoo kale sheegay in ujeeddada ugu weyn ee booqashada xoghayaha Golaha, Mohsen Rezaei, uu ku tegay Ruushka iyo kulanka uu la yeeshay Madaxweynaha Ruushka Vladimir Putin ay ahayd in Ruushka loo gudbiyo farriin ka timid Hoggaamiyaha Sare ee Iran, Mojtaba Khamenei.

   Sheekooyinka kale ee aad sii akhrin karto:

   Dunidu ma dhammaan doontaa 13-ka Nofeembar 2026? Saadaal hore oo mar kale hadal-haynteedu soo cusboonaatay

   Haweenka Kenya oo looga digay isticmaalka khaldan ee daawada Cetirizine

   Shirkado uu leeyahay maalqabeenka Elon Musk oo si weyn hoos ugu dhacay kadib doorashooyinkii Mareykanka

7. 6 Nofembar 2026Rag fuliyey dil argagax leh oo iyagana xukan adag lagu riday

   

   Maxkamad ku taalla gobolka Kano ee dalka Nigeria ayaa laba dhallinyaro ah ku xukuntay dil daldalaad ah, kaddib markii lagu helay dambiga dilka haweeney iyo lix carruur ah oo horraantii sannadkan lagu dilay xaafadda Dorayi ee magaalada Kano.

   Bishii Janaayo, haweeneyda iyo lixdeeda carruur ah ayaa si arxan darro ah loogu dilay gurigooda, xilli ay ahayd maalin, dhacdadaas oo argagax weyn dhalisay.

   Xeer-ilaaliyaha guud ee gobolka Kano, Baba Jibo Ibrahim, ayaa sheegay in saddex qof maxkamadda la soo taagay, kuwaas oo lagu eedeeyay inay dambiga geysteen, balse maxkamaddu ay midkood wax dambi ah ku weyday, sidaas darteedna ay sii deysay.

   "Laakiin labada qof ee lagu helay dambiga waxaa lagu xukumay xabsi daa'in, waxaana intaas u dheer lix sano oo xabsi ah oo la xiriirta dhac hubeysan," ayuu yiri.

   Wuxuu intaas ku daray in maxkamaddu sidoo kale labadooda ku xukuntay dil toogasho ah oo xarig lagu fulinayo, lix jeer, sababo la xiriira dilka haweeneyda iyo lixdeeda carruur ah.

   Baba Jibo ayaa sheegay in labada dhallinyaro ah ay haystaan muddo saddex bilood ah oo ay racfaan ku qaadan karaan haddii aysan ku qanacsanayn xukunka maxkamadda.

8. 6 Nofembar 2026Sawirro dayax-gacmeed oo muujiyey in Iiraan ay dib u dayactir ku wado saldhiyo hore looga duqeeyey

   

   Falanqayn lagu sameeyay sawirrada dayax-gacmeedka ayaa muujinaysa in Iran ay waddo mashaariic dhisme oo ballaaran oo ka socda agagaarka ugu yaraan laba ka mid ah saldhigyadeeda waaweyn ee gantaallada, iyadoo sidoo kale dayactir ku samaynaysa saldhigyo ay waxyeello ka soo gaartay duqeymihii cirka ee Mareykanka iyo Israa'iil bilihii la soo dhaafay.

   Sida ay sheegeen falanqeeyayaasha shirkadda sirdoonka ee MAIAR ee fadhigeedu yahay Britain, kuwaas oo baaray sawirrada, xogta dayax-gacmeedka ee la duubay bishii Nofeembar ayaa muujinaysa raadad qodis dhul iyo dhismayaal cusub oo ka socda saldhigga milatari ee Garmadara, oo ku yaalla Karaj una dhow Tehran, iyo saldhigga Shahroud ee waqooyiga Iran.

   Ugu yaraan 12 goobood oo kale oo milatari, oo ay ku jiraan xarumaha gantaallada iyo saldhigyada diyaaradaha, ayaa sidoo kale laga arkay calaamado muujinaya in dayactir lagu sameynayo.

   Dhismaha saldhigga gantaallada ee Kermanshah, oo ku yaalla galbeedka Iran una dhow xadka Ciraaq, ayaa saqafyo cusub la saaray dhismayaal ay hore u waxyeelleeyeen duqeymuhu.

   Dhanka kale, dhismayaal burburay iyo haraaga dhismayaasha ayaa laga qaaday xarunta milatari ee Parchin, oo ku taalla bariga Tehran. Xaruntan ayaa dhowr jeer dib loo dayactiray, inkastoo ay la kulantay duqeymo badan oo cirka ah.

   Jim Lamson, oo hore u ahaa falanqeeye ka tirsanaa hay'adda sirdoonka Mareykanka ee CIA, islamarkaana ku takhasusay arrimaha Iran, ayaa sheegay in qodista dhulka ee ka socota agagaarka Shahroud ay suuragal tahay inay xiriir la leedahay soo saarista gantaallada.

   Wuxuu sheegay in maadaama saldhigga diyaaradaha ee u dhow Shahroud dhowr jeer la bartilmaameedsaday sannadihii la soo dhaafay, ay suuragal tahay in Ilaalada Kacaanka Islaamiga ah ee Iran ay raadinayaan hab ay xarumahooda wax-soo-saarka ugu wareejiyaan dhulka hoostiisa.

   Falanqeeye ka tirsan shirkadda MAIAR ayaa sheegay in Iran ay jirto "isbeddel ku aaddan in kaabayaasha muhiimka ah loo raro dhulka hoostiisa, si looga ilaaliyo weerarro kale oo dhici kara".

   Mark Mallett, oo ah falanqeeye dhanka difaaca ah, horayna u soo noqday taliyihii ciidanka milatariga Ireland, ayaa sheegay in faa'iidada kale ee dhismayaasha dhulka hoostiisa laga sameeyo ay tahay inay "ku adkeynayaan dadka dibadda jooga inay ogaadaan baaxaddooda iyo xaaladda ay ku sugan yihiin marka la eego hawlgallada milatari".

   Toddobaadyadii la soo dhaafay waxaa sii kordhayay hadal-haynta ku saabsan suuragalnimada in Mareykanku dib u bilaabo weerarrada ka dhanka ah Iran, kaddib doorashooyinkii dhexe ee toddobaadkan ka dhacay Mareykanka.

   Hase yeeshee, Madaxweyne ku-xigeenka Mareykanka JD Vance ayaa Arbacadii sheegay in saameynta taban ee dagaalku ay door ku yeelatay go'aanka codbixiyeyaasha, taasoo sababtay in xisbiga Jamhuurigu uu natiijo liidata ka gaaro doorashooyinkii toddobaadkan.

   Sida uu sheegay, taasi waxay noqon kartaa sababta uu xisbigiisu u lumiyay gacan-ku-haynta Aqalka Senate-ka muddo lixda sano ee soo socota ah.

9. 6 Nofembar 2026Trump oo teleefoonka kula hadlay Amiirka Qadar, maxayse ka wadahadleen

   Dowladda Qadar ayaa ku dhawaaqday in Amiirka dalkaas, Sheekh Tamim bin Hamad Al Thani, uu Jimcihii khadka telefoonka kula hadlay Madaxweynaha Mareykanka Donald Trump, iyaga oo ka wada hadlay xaaladihii ugu dambeeyay ee gobolka.

   Sida ay sheegtay Wakaaladda Wararka Qatar ee rasmiga ah, intii uu socday wada hadalka, Amiirka Qatar iyo Madaxweynaha Mareykanka waxay ka arrinsadeen dadaallada diblomaasiyadeed ee socda ee heer caalami, gaar ahaan dhexdhexaadinta Qatar ee lagu doonayo in la isu soo dhoweeyo mowqifyada dhinacyada isku haya, isla markaana horumar looga sameeyo wada xaajoodyada.

   Amiirka Qatar ayaa wada hadalka ku adkeeyay muhiimadda ay leedahay sii wadidda wadahadalka iyo adeegsiga diblomaasiyadda si khilaafaadka loo xalliyo, looga hortago in xiisadaha gobolka ay sii kordhaan, loona ilaaliyo xorriyadda isu-socodka maraakiibta ee marin-biyoodka caalamiga ah iyo amniga sahayda tamarta.

   Sheekooyinka kale ee aad sii akhrin karto:

   Dunidu ma dhammaan doontaa 13-ka Nofeembar 2026? Saadaal hore oo mar kale hadal-haynteedu soo cusboonaatay

   Haweenka Kenya oo looga digay isticmaalka khaldan ee daawada Cetirizine

   Shirkado uu leeyahay maalqabeenka Elon Musk oo si weyn hoos ugu dhacay kadib doorashooyinkii Mareykanka

10. 6 Nofembar 2026Wadaad amray in 191 carruur ah gaajo loo dilo oo xukun adag lagu riday

    

    Xigashada Sawirka, Reuters

    Maxkamad ku taalla dalka Kenya ayaa maanta xukun ku riday hoggaamiyihii koox diimeed aaminsanayd in dunidu dhammaanayso ee dalka Kenya, waxaa lagu xukumay 200 oo sano oo xabsi ah, kaddib markii lagu helay dambiga dilka in ka badan 190 qof, kuwaas oo dhammaantood carruur ahaa marka laga reebo hal qof.

    Xeer-ilaaliyeyaasha ayaa sheegay in Paul Mackenzie uusan muujin wax qoomamo ah, isla markaana ay ahayd in lagu xukumo dil toogasho ah.

    Mackenzie iyo 27 qof oo la shaqaynayay ayaa xubnaha kooxdooda ku amray inay carruurtooda gaajo u dilaan, si ay sida ay aaminsanaayeen ula kulmaan Ciise Masiix.

    Ninkan isku magacaabay wadaadka ayaa la xiray sannadkii 2023, kaddib markii in ka badan 400 oo mayd laga helay qabuuraha gaagaaban ee ku yaalla kaynta Shakahola, oo u dhow xeebaha Kenya.

    Baaritaanka ballaaran ee kiiskan ayaa argagax ku abuuray shacabka Kenya, wuxuuna soo jiitay indhaha caalamka.

    Sheekooyinka kale ee aad sii akhrin karto:

    Dunidu ma dhammaan doontaa 13-ka Nofeembar 2026? Saadaal hore oo mar kale hadal-haynteedu soo cusboonaatay

    Haweenka Kenya oo looga digay isticmaalka khaldan ee daawada Cetirizine

    Shirkado uu leeyahay maalqabeenka Elon Musk oo si weyn hoos ugu dhacay kadib doorashooyinkii Mareykanka

11. 6 Nofembar 2026Aqalka Cad oo war ka soo saaray warar la faafiyey oo ku saabsan laba wasiir oo ka tirsan mamaulka Trump

    

    Xigashada Sawirka, EPA

    Aqalka Cad ee Mareykanka ayaa beeniyay wararka la isla dhexmarayo ee sheegaya in Xoghayaha Difaaca Pete Hegseth iyo Xoghayaha Arrimaha Dibadda Marco Rubio ay xilalkooda ka tagi karaan, iyadoo maamulka Trump uu isku diyaarinayo isbeddello shaqo oo ka dambeeya doorashada.

    Warbaahinta Mareykanka ayaa sheegtay in baaqyo la jeedinayo oo ku saabsan in xilka laga qaado Hegseth, gaar ahaan sida uu u maareeyay dagaalka Iran, kaas oo lagu eedeynayo inuu sabab u noqday guuldarrooyin waaweyn oo xisbiga Jamhuuriga kala kulmay doorashada.

    Xubin ka tirsan xisbiga Jamhuuriga oo ka sii baxaysa Congress-ka ayaa ku hanjabtay inay horraanta toddobaadka soo socda dhaqaajin doonto cod loo qaadayo xil-ka-qaadista Hegseth.

    Xoghayaha Difaaca ayaa bartiisa bulshada ku baahiyay muuqaal uu ku difaacayo waxqabadkiisa, isla markaana uu ku cambaareynayo dadaallada xilka looga qaadayo.

    "Waad arkaysaan, way i weerarayaan. Annaga ayay na weerarayaan sababtoo ah shaqadeenna si hufan ayaan u gudannaa," ayuu yiri.

    "Taasi ma shaqayn doonto. Dib uma noqon doonno," ayuu raaciyay.

    Sheekooyinka kale ee aad sii akhrin karto:

    Dunidu ma dhammaan doontaa 13-ka Nofeembar 2026? Saadaal hore oo mar kale hadal-haynteedu soo cusboonaatay

    Haweenka Kenya oo looga digay isticmaalka khaldan ee daawada Cetirizine

    Shirkado uu leeyahay maalqabeenka Elon Musk oo si weyn hoos ugu dhacay kadib doorashooyinkii Mareykanka

12. 6 Nofembar 2026Trump oo sheegay inay go’aan ka gaari doonaan Iiraan

    

    Xigashada Sawirka, EPA

    Madaxweynaha Mareykanka Donald Trump ayaa sheegay in Washington ay go'aan ka gaari doonto in ay tallaabooyin dheeraad ah ka qaaddo Iran iyo in kale, ama ay ansixiso heshiis suuragal ah oo labada dhinac gaaraan.

    Isagoo su'aalo uga jawaabayay wariyeyaasha Aqalka Cad, Trump ayaa sheegay in faahfaahinta soo jeedimaha ay Iran ka fiirsanayso aysan muhiim ahayn, maadaama aysan Iran heli doonin hub nukliyeer ah.

    Wuxuu sheegay in Tehran aysan qaadi doonin wax tallaabo ah iyada oo aan oggolaansho ka helin Washington.

    Sida ay baahisay BBC-da Carabiga, Trump ayaa sidoo kale sheegay inuusan doonayn inuu "burburiyo wixii ka haray Iran, balse laga yaabo inaan ku khasbanaado".

    Trump ayaa ku andacooday in tan iyo markii uu faragelinta ku bilaabay arrimaha Iran toddobo bilood ka hor, Mareykanku uu gacanta ku dhigay dhammaan arrimihii uu doonayay inuu maamulo.

    "Wax yar kadib ayaad ogaan doontaan go'aanka aan ka qaadan doonno Iran," ayuu yiri.

13. 6 Nofembar 2026Kala qaybsanaan ka dhex jirta Dimuqraadiyiinta oo ku saabsan in xilka laga qaado Trump

    

    Xigashada Sawirka, Getty Images

    Waxaa jira kala qaybsanaan ka dhex jirta Dimuqraadiyiinta oo ku saabsan tallaabada lagu doonayo in xilka looga qaado Madaxweyne Trump markii saddexaad.

    Qaar ka mid ah, sida Alexandria Ocasio-Cortez, ayaa taageeray arrinta, iyagoo soo xiganaya caddaymo muujinaya sharci darrada dagaalka Iiraan iyo arrimo kale oo loo isticmaali karo in isagoo xilka haya dacwad lagu soo oogo.

    Dhanka kale, qaar ayaa aaminsan in taxaddar la sameeyo, iyagoo sheegaya in dadaalkan uusan u badnayn inuu guuleysto, gaar ahaan marka laga hadlayo in Trump awoodda laga xayuubiyo.

    Sidoo kale ma cadda in Dimuqraadiyiintu ay yeelan doonaan hal dood oo ay ku sii adkaysanayaan isku daygooda ah inay xilka kaga qaadaan Trump.

    "Waxaan sameyn karaa wax kasta oo aan rabo" ayuu Trump ugu sheegay wariyeyaasha xafiiskiisa Aqalka Cad bishii Oktoobar. Wuxuu isku dayga lagu doonayo in xilka looga qaado inta lagu jiro xilligiisii ugu horreeyay oo maxkamad la soo taagay ku tilmaamay "sharci darro."

    Ma cadda in dadaallada Dimuqraadiyiintu ay ku doonayaan inay xilka kaga qaadaan Trump ay horseedi doonaan tallaabo macno leh oo ka dhan ah.

    Si kastaba ha ahaatee, Suhas Subramaniyam wuxuu aaminsan yahay in tallaabadan loo la qaado ay gudbin doonto farriin muhiim ah.

    "Haddii aan diidno inaan tallaabo qaadno ayadoo sababtuna tahay in aan baqayno waxa dadku dhihi doonaan, ama aan aynaan ku guulaysan doonin, ama sababtoo ah dhinaca kale ayaa faragelin doona, taasi waxay noqon doontaa qalad" ayuu yiri.

14. 6 Nofembar 2026Iiraan oo dayactir ballaaran ka wada goobaha gantaallada ee waxyeelladu gaartay

    

    Xigashada Sawirka, Reuters

    Dalka Iiraan ayaa u muuqda inuu dayactir ballaaran ka wado goobihii gantaallada ee waxyeelladu soo gaartay.

    Tallaabadan ayaa laga yaabaa inay ujeeddadeedu tahay in hubka laga ilaaliyo weerarro cusub oo ay Maraykanka ama Israa'iil soo qaadaan.

    Caddaynta arrintan ayaa ka timid baaritaan ay BBC ku samaysay sawirrada dayax-gacmeedka.

    Khubarada ayaa sheegaya in sawirradu muujinayaan in Iiraan ay qaadi karto tallaabooyin taxaddar ah oo ay isku difaacayso duqeymo cirka ah oo cusub, iyadoo laga yaabo inay gabaad gelinayso hubka iyo saanadda milatari ee muhiimka ah.

    Baadhitaan ay samaysay BBC Verify ayaa muujinaya in dayactirku ka socdo ugu yaraan 12 goobood.

    Goobahaas waxaa ka mid ah xarun milatari oo ku taalla bariga magaalada Tehran, halkaas oo laga nadiifiyey dhismayaal burburay iyo burburka kale, inkastoo goobtaas ay hore dhowr jeer u bartilmaameedsadeen duqeymo cirka ah.

    Sidoo kale akhri:

    Guusha Dimuqraadiyiinta oo dhalisay su'aalo badan oo ku saabsan mustaqbalka Trump

    Iran oo u digtay Maraykanka: "Dagaal kasta oo cusub wuxuu noqon karaa mid waqti dheer qaata, oo aan lahayn xaddidaadyo dhuleed"

    Xog la yaab leh oo uu sheegay madaxii hore ee hay'adda sirdoonka Israa'iil ee Mossad

15. 6 Nofembar 2026Baarlamaanka Paraguay oo bilaabaya hannaanka xil-ka-qaadista madaxweynaha

    

    Xigashada Sawirka, John Lamparski/Bloomberg via Getty Images

    Baarlamaanka dalka Paraguay ayaa go'aansaday inuu bilaabo hannaanka xil-ka-qaadista madaxweynaha dalkaas, Santiago Peña, saacado uun kaddib markii uu isku dayay inuu xilka iska casilo sababo la xiriira fadeexad ka dhalatay bangiyada.

    Madaxweyne Peña ayaa xiriir la leh bangiga Ueno Bank, kaas oo burburkiisu sababay in ku dhowaad kala bar shacabka Paraguay ay waayaan fursaddii ay ku heli lahaayeen lacagihii ay bangiga ku kaydsadeen.

    Mr Peña ayaa sheegay inuu ka soo qayb geli doono dhageysiga dacwadda si uu isu difaaco.

    Dhanka kale, kumannaan qof ayaa mudaharaadyo isaga ka dhan ah ka dhigaya meel u dhow xarunta Baarlamaanka.

    Sidoo kale akhri:

    Shirkado uu leeyahay maalqabeenka Elon Musk oo si weyn hoos ugu dhacay kadib doorashooyinkii Mareykanka

    Afar arrimood oo keeni kara in baaritaan lagu sameeyo Trump ka dib guuldarradii xisbigiisu kala kulmay Kongareska

    Maxkamadda Sare oo waxba kama jiraan ku sheegtay muddo-xileedka shanta sano ah ee dowladdu ay sheegtay inuu dhaqan-gal yahay

16. 6 Nofembar 2026Bahda ciyaaraha dunida oo maanta hareeyey dareen xasuus leh

    

    Xigashada Sawirka, Getty Images

    Bahda ciyaaraha dunida ayaa waxaa maanta hareeyey dareen xasuus leh, ka dib markii Cristiano Ronaldo oo ka mid ahaa ciyaaryahannada ugu caansan ee garoomada kubadda cagta uu si rasmi ah ugu dhawqaaqay in uu gebi ahaanba ka fariisanayo u ciyaarista xulka qaranka Portugal.

    Taageerayaasha kubadda cagta ee dunida dacalladeeda kala jooga ayuu filan waa kun noqday warkan, kaddib markii Ronaldo uu baraha bulshada ku shaaciyey in uu soo afjaray waayihiisii ciyaareed ee heerka xulka qaranka.

    Waxayna tani soo ka dhigan tahay dhammaadka waayihii dahabiga ahaa ee kubadda cagta, iyo xiritaanka bog taariikhi ah oo ka mid ah taariikhda ciyaarta quruxda badan ee kubadda cagta.

    Sidoo kale akhri

    Shan waxyaabood oo Cristiano Ronaldo doonayo inuu gaaro ka hor inta uusan ciyaaraha ka fariisan

    Ronaldo: ma la gaadhay xilligii dalkiisu ka maarmi lahaa?

    Maxaa ka dhex jira Ronaldo iyo naadigiisa Al Nassr?

17. 5 Nofembar 2026Sarkaal ka tirsan Aqalka Cad: Trump wax dhib ah kama qabin qoraalkii Vance ee dagaalka Iiraan

    

    Xigashada Sawirka, Reuters

    Fagaarayaasha siyaasadda ee Washington ayaa weli hadal-haya warar la isla dhexmarayo oo sheegaya inuu khilaaf soo kala dhexgalay Madaxweyne Donald Trump iyo ku-xigeenkiisa JD Vance, kaddib markii Vance uu shalay qoraal uu baahiyay ku eedeeyay dagaalka Iiraan inuu sabab u ahaa guuldarradii lama filaanka ahayd ee xisbiga Jamhuuriga ka soo gaartay doorashadii xilliga dhexe ee Maraykanka.

    Hase yeeshee, sarkaal ka tirsan Aqalka Cad ayaa BBC-da u sheegay in Aqalka Cad uu horay ula socday qoraalka Vance ka hor inta aan la baahin.

    Sarkaalka ayaa intaa ku daray in Trump uusan wax dhib ah ka qabin qoraalkaas, taasina ay sababtay inuu taageero hadalka Vance markii su’aalo arrintaas ku saabsan la weydiiyay intii uu shalay ka hadlayay Aqalka Cad.

    JD Vance ayaa si weyn loogu tiriyaa xubnaha ku dhow Trump inuu ahaa qofka ugu yar ee taageersanaa fikradda dagaal ka dhan ah Iiraan. Waxa kale oo uu matalaa garabka xisbiga Jamhuuriga ee doonaya in Maraykanku ka fogaado ku lug lahaanshaha dagaallo dibadeed oo daba dheeraada.

    Hase yeeshee, kala aragti duwanaanshaha noocaas ah ayaa inta badan ka dhici jiray albaabada xiran, iyadoo aan si cad loo soo bandhigin, ilaa qoraalkii Vance ee shalay.

    Sidoo kale akhri:

    Maxkamadda Sare oo waxba kama jiraan ku sheegtay muddo-xileedka shanta sano ah ee dowladdu ay sheegtay inuu dhaqan-gal yahay

    Shan arrimood oo sababay guuldarradii xisbiga Jamhuuriga uu kala kulmay doorashada xilliga dhexe

    Siyaasigii waday aqoonsiga Somaliland oo waayey kursigiisii Kongareska. Sidee doorashadan u saameysay siyaasiyiinta kale ee taageera ictiraafka Somaliland?

    Trump oo dhaleeceeyay Jamhuuriga, balse wuxuu sheegay in Dimuqraadiyiintu ay qabteen 'shaqo wanaagsan'

18. 5 Nofembar 2026Tirada kuraasta Kongareska ay ka heleen xisbiga Dimuqraadiga oo korortay

    

    Xigashada Sawirka, Reuters

    Iyadoo ay weli soo baxayaan natiijooyinka doorashooyinka ka dhacay gobollo kala duwan oo Maraykanka ah, dhowr kursi oo ka tirsan Aqalka Wakiillada ayaa hadda ku guuleystay musharraxiin Dimuqraadi ah.

    • Shannon L. Taylor oo ka tirsan xisbiga Dimuqraadiga ayaa kursi kala wareegtay Jamhuuriga gobolka Virginia.
    • Sidoo kale, Sam Forstag oo Dimuqraadi ah ayaa kursi ka helay gobolka Montana.
    • Don Davis oo isaguna Dimuqraadi ah ayaa xisbigiisa u xafiday kursigii uu ku lahaa gobolka North Carolina.

    Taas ayaa tirada kuraasta Dimuqraadiyiintu ku leeyihiin Aqalka Wakiillada ka dhigaysa 247 kursi, halka Jamhuuriyiintu haystaan 153 kursi. Waxaa weli natiijadooda la sugayaa 35 kursi.

    Sidoo kale akhri:

    Maxkamadda Sare oo waxba kama jiraan ku sheegtay muddo-xileedka shanta sano ah ee dowladdu ay sheegtay inuu dhaqan-gal yahay

    Shan arrimood oo sababay guuldarradii xisbiga Jamhuuriga uu kala kulmay doorashada xilliga dhexe

    Siyaasigii waday aqoonsiga Somaliland oo waayey kursigiisii Kongareska. Sidee doorashadan u saameysay siyaasiyiinta kale ee taageera ictiraafka Somaliland?

    Trump oo dhaleeceeyay Jamhuuriga, balse wuxuu sheegay in Dimuqraadiyiintu ay qabteen 'shaqo wanaagsan'

19. 5 Nofembar 2026Wasiiradda arrimada dibadda ee Sacuudiga iyo Iiraan oo wadahadal telefoonka yeeshay

    Wakaaladda wararka IRNA ayaa sheegtay in labada dhinac ay is dhaafsadeen aragtiyo ku saabsan “xaaladihii ugu dambeeyay ee gobolka iyo halka ay marayaan dadaallada diblomaasiyadeed ee lagu doonayo in xasillooni lagu soo dabaalo gobolka”, balse faahfaahin dheeraad ah ma aysan bixin.

    Sida ay sheegtay IRNA, Abbas Araqchi ayaa sidoo kale wada-hadallo la yeeshay wasiirrada arrimaha dibadda Qatar iyo Cumaan, oo ka qayb qaadanayay dadaallada dhexdhexaadinta khilaafka kala dhexeeya Maraykanka.

    Waxa kale oo uu khadka telefoonka kula hadlay dhiggiisa Turkiga, Urdun iyo Kuweyt.

    Sidoo kale akhri:

    Maxkamadda Sare oo waxba kama jiraan ku sheegtay muddo-xileedka shanta sano ah ee dowladdu ay sheegtay inuu dhaqan-gal yahay

    Shan arrimood oo sababay guuldarradii xisbiga Jamhuuriga uu kala kulmay doorashada xilliga dhexe

    Siyaasigii waday aqoonsiga Somaliland oo waayey kursigiisii Kongareska. Sidee doorashadan u saameysay siyaasiyiinta kale ee taageera ictiraafka Somaliland?

    Trump oo dhaleeceeyay Jamhuuriga, balse wuxuu sheegay in Dimuqraadiyiintu ay qabteen 'shaqo wanaagsan'

20. 5 Nofembar 2026Putin oo loo gudbiyey fariin ka timid hoggaamiyaha sare e Iran Mojtaba Khamenei

    

    Xigashada Sawirka, ISNA

    Sida ay sheegayaan warbaahinta Iran, Mohsen Rezaei, oo ah xoghaynta Golaha Sare ee Amniga Qaranka Iran, ayaa magaalada Moscow kula kulmay hoggaamiyaha Ruushka Vladimir Putin, isaga oo u gudbiyay farriin ka timid hoggaamiyaha Iran, Mojtaba Khamenei.

    Horey, afhayeenka Kremlin-ka Dmitry Peskov ayaa shaaciyay in Vladimir Putin uu Kremlin-ka kula kulmay xoghayaha Golaha Sare ee Amniga Qaranka Iran, isla markaana ay wada hadleen.

    Kulanka ayaa dhacay maalmo kaddib markii ay labada dhinac yeesheen wada hadal dhanka telefoonka ah.

    Golaha Sare ee Amniga Qaranka Iran ayaa Isniintii sheegay in Mohsen Rezaei iyo Vladimir Putin ay khadka telefoonka kaga wada hadleen xaaladaha gobolka iyo kuwa caalamka, gaar ahaan xaaladda Bariga Dhexe.

    Sidoo kale akhri:

    Maxkamadda Sare oo waxba kama jiraan ku sheegtay muddo-xileedka shanta sano ah ee dowladdu ay sheegtay inuu dhaqan-gal yahay

    Shan arrimood oo sababay guuldarradii xisbiga Jamhuuriga uu kala kulmay doorashada xilliga dhexe

    Siyaasigii waday aqoonsiga Somaliland oo waayey kursigiisii Kongareska. Sidee doorashadan u saameysay siyaasiyiinta kale ee taageera ictiraafka Somaliland?

    Trump oo dhaleeceeyay Jamhuuriga, balse wuxuu sheegay in Dimuqraadiyiintu ay qabteen 'shaqo wanaagsan'