செடிரிசின்: ஒவ்வாமை மாத்திரையை பிறப்புறுப்பில் செலுத்திக்கொள்ளும் பெண்கள் - நிபுணர்கள் எச்சரிக்கை

பெண்களின் தனிப்பட்ட ஆரோக்கியம் தொடர்பான ஒரு தவறான ஆலோசனை சமூக ஊடகங்களில் பரவி வருகிறது. இது ஆபத்தானது என மருத்துவ நிபுணர்கள் தெரிவிக்கின்றனர்.

ஒவ்வாமைக்கு (அலர்ஜி) பயன்படுத்தப்படும் செடிரிசின் மாத்திரைகளைப் பெண்கள் தங்கள் பிறப்புறுப்பில் செலுத்தினால், யோனித் தசைகள் இறுக்கமடையும் என்றும், இதனால் உடலுறவின்போது இன்பம் அதிகரிக்கும் என்றும் சமூக ஊடகங்களில் பதிவுகள் வெளியாகியுள்ளன.

ஆனால், செடிரிசினை இவ்வாறு பயன்படுத்துவதற்கு எந்த அனுமதியும் இல்லை என்றும், இந்தப் பயன்பாடு பாதுகாப்பானதா என்பது குறித்து எந்தப் பரிசோதனையும் நடத்தப்படவில்லை என்றும் நிபுணர்கள் கூறுகின்றனர்.

பெண்கள் தங்கள் பிறப்புறுப்பில் செடிரிசின் மாத்திரைகளைச் செலுத்த வேண்டாம் என்று கென்ய மருந்தாளுநர்கள் சங்கம் (பிஎஸ்கே) எச்சரித்துள்ளது.

செடிரிசின் என்பது பொதுவாக ஒவ்வாமை பாதிப்புகளுக்குப் பயன்படுத்தப்படும் மருந்து. தும்மல், மூக்கு ஒழுகுதல், கண்களில் அரிப்பு, தோலில் தடிப்புகள் போன்ற அறிகுறிகளில் இருந்து நிவாரணம் பெற இது பயன்படுத்தப்படுகிறது. இந்த மருந்து வாய்வழியாக உட்கொள்வதற்காக மட்டுமே தயாரிக்கப்பட்டுள்ளது.

இந்தப் போக்கு எப்படித் தொடங்கியது?

செடிரிசின் பயன்பாடு தொடர்பான பல பதிவுகள் இந்த வாரத் தொடக்கத்தில் டிக்டாக்கில் வைரலானதைத் தொடர்ந்து இந்த விவாதம் தொடங்கியது.

இந்த மாத்திரையைப் பயன்படுத்துவதால் பெண்களின் பிறப்புறுப்பில் ஈரப்பதம் குறையும் என்றும், இதனால் உடலுறவின்போது இறுக்கமான உணர்வு ஏற்படும் என்றும் அந்தப் பதிவுகளில் கூறப்பட்டிருந்தது.

ஒவ்வாமை எதிர்ப்பு மருந்துகளின் பக்கவிளைவாக சில நேரங்களில் உடலில் வறட்சி ஏற்படலாம். ஆனால், இதனால் பிறப்புறுப்புத் தசைகள் வலுப்பெறாது என்று நிபுணர்கள் தெளிவுபடுத்துகின்றனர்.

"செடிரிசினைப் பயன்படுத்துவதால் பிறப்புறுப்பு இறுக்கமடையும் என்பது உண்மையல்ல. இதனால் உராய்வு அதிகரித்து அசௌகரியம் ஏற்படலாம். உணர்திறன் மிக்க உள் திசுக்களில் காயங்கள் ஏற்படவும் வாய்ப்புள்ளது" என்று கென்ய மருந்தாளுநர்கள் சங்கம் தெரிவித்துள்ளது.

"வாய்வழியாக உட்கொள்வதற்காகத் தயாரிக்கப்பட்ட மாத்திரைகளைப் பிறப்புறுப்பில் செலுத்துவது பாதுகாப்பானது அல்ல. செடிரிசின் மாத்திரைகள் விழுங்குவதற்காக மட்டுமே தயாரிக்கப்பட்டவை. அவற்றில் உள்ள பொருட்களை உடலின் உணர்திறன் மிக்க பகுதிகளில் பயன்படுத்தினால் என்ன விளைவுகள் ஏற்படும் என்பது குறித்து எந்தப் பரிசோதனையும் நடத்தப்படவில்லை" என்றும் அந்தச் சங்கம் கூறியுள்ளது.

வைரல் தகவல் குறித்த விவாதம்

இந்தத் தகவல் சமூக ஊடகங்களில் பரவியதைத் தொடர்ந்து, இதன் பாதுகாப்பு குறித்து விவாதங்கள் எழுந்துள்ளன.

சமூக ஊடகப் பயனர்கள் சிலர் இந்த முறையை ஊக்குவித்து வரும் நிலையில், வேறு சிலர் இவ்வாறு பயன்படுத்துவது எந்த அளவுக்குப் பாதுகாப்பானது என்று கேள்வி எழுப்புகின்றனர்.

இதற்கிடையே, செடிரிசின் விலை அதிகரித்துள்ளதாக உள்ளூர் ஊடகங்களில் செய்திகள் வெளியாகியுள்ளன. குறிப்பாக, தலைநகர் நைரோபியில் உள்ள சில மருந்தகங்களில் இந்த மருந்துக்கான தேவை அதிகரித்துள்ளதாகச் செய்திகள் தெரிவிக்கின்றன.

கென்யாவில் மருந்தாளுநர்களைப் பிரதிநிதித்துவப்படுத்தும் அமைப்பான பிஎஸ்கே, வியாழக்கிழமை வெளியிட்ட அறிக்கையில், "செடிரிசின் ஒவ்வாமைக்குப் பயன்படுத்தப்படும் மருந்து. இதை வாய்வழியாக மட்டுமே உட்கொள்ள வேண்டும். வேறு பயன்பாடுகளுக்கு இந்த மருந்துக்கு அனுமதி வழங்கப்படவில்லை. அத்தகைய பயன்பாடுகளுக்காக எந்தப் பரிசோதனையும் நடத்தப்படவில்லை. குறிப்பாக, பிறப்புறுப்பில் பயன்படுத்துவதற்கு எந்த அனுமதியும் இல்லை" என்று தெளிவுபடுத்தியுள்ளது.

"ஏற்கெனவே யாராவது இந்த முறையைப் பயன்படுத்தியிருந்தால், உடனடியாக அதை நிறுத்த வேண்டும். வலி, ரத்தப்போக்கு, எரிச்சல், அரிப்பு, வழக்கத்துக்கு மாறான சுரப்பு அல்லது காய்ச்சல் போன்ற அறிகுறிகள் ஏற்பட்டால் மருத்துவர்களை அணுக வேண்டும்" என்றும் அந்த அமைப்பு அறிவுறுத்தியுள்ளது.

ஆரோக்கியம் தொடர்பான தகவல்களைப் பகிரும்போது எச்சரிக்கையுடன் செயல்படுமாறு இன்ஃப்ளூயென்சர்கள் மற்றும் கன்டென்ட் கிரியேட்டர்களுக்கும் பிஎஸ்கே அறிவுறுத்தியுள்ளது.

சரியான ஆய்வுகள் இல்லாமல் பரப்பப்படும் தகவல்கள் மக்களின் ஆரோக்கியத்தை ஆபத்தில் ஆழ்த்தக்கூடும் என்றும் அந்த அமைப்பு தெரிவித்துள்ளது.

'விளைவுகளைக் கவனத்தில் கொள்வதில்லை'

இந்த வைரல் போக்கு குறித்து கென்ய சுகாதாரத் துறை கவலை தெரிவித்த ஒரு நாளுக்குப் பிறகு, அந்நாட்டின் மருந்தாளுநர்கள் சங்கம் கவலை தெரிவித்துள்ளது.

சமூக ஊடகங்களில் சிலர் நிபுணர்களின் மருத்துவ ஆலோசனைகளைப் பொருட்படுத்துவதில்லை என்றும், அதனால் ஏற்படக்கூடிய விளைவுகளைக் கவனத்தில் கொள்வதில்லை என்றும் சுகாதாரத் துறையின் மூத்த அதிகாரி ஓமா ஒலுகா தெரிவித்துள்ளார்.

மருந்துகளின் விற்பனை மற்றும் கொள்முதலைக் கண்காணிப்பதற்கான ஒரு அமைப்பைத் தொடங்குவது குறித்து அதிகாரிகள் பரிசீலிக்கலாம் என்றும் அவர் பரிந்துரைத்துள்ளார்.

இதன் மூலம் எந்தெந்த மருந்துகள் தவறாகப் பயன்படுத்தப்படுகின்றன என்பதைக் கண்டறிவது எளிதாகும் என்றும் அவர் கூறியுள்ளார். எனினும், அத்தகைய அமைப்பைத் தொடங்குவது குறித்து இதுவரை எந்த அதிகாரப்பூர்வ முடிவும் எடுக்கப்படவில்லை.

மருந்துக்கான தேவை அதிகரிப்பது குறித்த கவலை

செடிரிசினுக்கான தேவை மற்றும் அதன் விலை அதிகரித்து வருவதாக வெளியாகும் செய்திகள் தங்கள் கவனத்துக்கு வந்துள்ளதாக பிஎஸ்கே தெரிவித்துள்ளது. சில மருந்தகங்களில் இந்த மருந்துக்குத் தட்டுப்பாடு ஏற்பட்டுள்ளதாகவும் செய்திகள் வருவதாக அந்த அமைப்பு குறிப்பிட்டுள்ளது.

இந்த வைரல் போக்கைப் பயன்படுத்தி லாபம் ஈட்ட முயற்சிக்க வேண்டாம் என்று மருந்து விற்பனையாளர்களுக்கு அது அறிவுறுத்தியுள்ளது.

இதேபோல் தேவை தொடர்ந்து அதிகரித்தால், உண்மையிலேயே ஒவ்வாமை சிகிச்சைக்காக செடிரிசின் தேவைப்படுபவர்களுக்கு அந்த மருந்து கிடைப்பது கடினமாகிவிடும் என்றும் எச்சரித்துள்ளது.

தவறாகப் பயன்படுத்தப்பட வாய்ப்புள்ள மருந்துகளைத் திட்டமிட்டு விற்பனை செய்ய வேண்டாம் என்று தங்கள் உறுப்பினர்களுக்கும் பிஎஸ்கே அறிவுறுத்தியுள்ளது.

மருந்து தவறாகப் பயன்படுத்தப்பட்டதால் ஏதேனும் பக்கவிளைவுகள் ஏற்பட்டால், அது குறித்து சுகாதார அதிகாரிகளுக்குத் தெரிவிக்குமாறும் கேட்டுக்கொண்டுள்ளது.

சமூக ஊடகங்களில் பரவும் ஆதாரமற்ற மருத்துவக் குறிப்புகளைவிட நிபுணர்களின் ஆலோசனைகளுக்கே முன்னுரிமை அளிக்க வேண்டும் என்று பிஎஸ்கே தனது அறிக்கையின் இறுதியில் வலியுறுத்தியுள்ளது.

"ஒரு மருந்து எந்தப் பயன்பாட்டுக்காகத் தயாரிக்கப்பட்டதோ, அதற்கு மாறாக வேறு நோக்கத்துக்குப் பயன்படுத்த நினைத்தால், முதலில் மருந்தாளுநரை அணுகுங்கள். மருத்துவ ஆலோசனைகளுக்காக சமூக ஊடகங்களைச் சார்ந்திருக்க வேண்டாம்" என்று அந்த அமைப்பு அறிவுறுத்தியுள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு