அமெரிக்காவில் அனைத்து விமானங்களையும் தரையிறக்க உத்தரவு - 4 மணி நேரம் நீடித்த தடையில் என்ன நடந்தது?

அமெரிக்காவில் விமானப் போக்குவரத்துக் கட்டுப்பாட்டு தொடர்பு அமைப்பில் ஏற்பட்ட தொழில்நுட்பக் கோளாறு காரணமாக, நாடு முழுவதும் விமானச் சேவைகள் தற்காலிகமாக நிறுத்தப்பட்டிருந்தன.

இந்த நிலையில், சுமார் நான்கு மணி நேரத்துக்குப் பிறகு, விமானங்கள் மீண்டும் இயங்கத் தொடங்கியதாக, அமெரிக்க ஊடகங்கள் செய்தி வெளியிட்டுள்ளன.

அமெரிக்க போக்குவரத்துத் துறை அமைச்சர் சீன் டஃபி, வான்வெளி மீண்டும் திறக்கப்பட்டதை உறுதிப்படுத்தியுள்ளார்.

"எங்களுடைய கட்டுப்பாட்டு மையங்களும், விமானப் போக்குவரத்து முனையக் கட்டுப்பாட்டு அமைப்புகளும் தற்போது செயல்பாட்டில் உள்ளன," என்று அவர் செய்தியாளர் சந்திப்பில் கூறினார்.

மேலும் அவர், "நிகழ்ந்த குளறுபடிகளைச் சரிசெய்து, நிலைமையைச் சீர்செய்ய சிறிது காலம் தேவைப்படும்." என்றும் தெரிவித்தார்.

என்ன நடந்தது?

இந்தச் சம்பவம் எவ்வாறு நிகழ்ந்தது என்பது குறித்த காலவரிசையை டஃபி செய்தியாளர் சந்திப்பில் விளக்கினார்.

"உள்ளூர் நேரப்படி (நவம்பர் 13) பிற்பகல் 3:36 மணிக்கு, நாடு முழுவதும் உள்ள எங்கள் ரேடார், தகவல் தொடர்பு மற்றும் மையங்களில் நிலையற்ற தன்மையை நாங்கள் அனுபவித்தோம். ரவுட்டர்களிலிருந்து முரண்பாடான தரவுகள் பதிவாகத் தொடங்கியவுடன், நாடு தழுவிய விமானப் போக்குவரத்தை நிறுத்த அறிவுறுத்தப்பட்டது," என்று அவர் கூறுகிறார்.

தொடர்ந்து விளக்கிய அவர், "எங்களிடம் இருப்பது மிகவும் பழமையான விமானப் போக்குவரத்துக் கட்டுப்பாட்டு அமைப்பு, ரவுட்டர்கள் 'தரவுகளால் அதிக சுமையேற்றப்பட்டதால்', அந்த ரவுட்டர்களிடமிருந்து பெறப்பட்ட தரவுகளில் "முரண்பாடு" ஏற்பட்டது." என்றார்.

மேலும் அவர் கூறுகையில், "நவீன வசதிகள் கொண்ட வான் போக்குவரத்து அமைப்பை உருவாக்கத் தேவையான வளங்களை நாடாளுமன்றம் வழங்க வேண்டும். இந்த அமைப்பைச் சீரமைக்க 50 பில்லியன் டாலர்கள் தேவை." என்றும் தெரிவித்தார்

2001-ஆம் ஆண்டு செப்டம்பர் 11 தாக்குதலுக்குப் பிறகு, அமெரிக்க விமானப் போக்குவரத்தில் ஏற்பட்டுள்ள மிகப்பெரிய பாதிப்பு இது என்று அமெரிக்காவின் தேசிய போக்குவரத்துப் பாதுகாப்பு வாரியத்தின் முன்னாள் தலைவரான ராபர்ட் எல். சம்வால்ட் தெரிவித்துள்ளார்.

அமெரிக்காவின் சிபிஎஸ் செய்தி நிறுவனத்திடம் பேசிய அவர், "இன்றைய காலகட்டத்திலும் இதுபோன்ற ஒன்று நடக்கக்கூடும் என்பது அதிர்ச்சியளிக்கிறது" என்று கூறினார்.

இந்தச் சம்பவம் அமெரிக்கா மீதான எந்தவொரு தாக்குதலையும் குறிக்கவில்லை என்றும், அனைவரும் பாதுகாப்பாக இருப்பதாகவும் அமெரிக்க உள்நாட்டுப் பாதுகாப்புத் துறைச் அமைச்சர் மார்க்வெய்ன் முல்லின் தெரிவித்துள்ளார்.

அமெரிக்காவுக்கும் கனடாவுக்கும் இடையிலான அனைத்து விமானச் சேவைகளும் தற்காலிகமாக ரத்து செய்யப்பட்டுள்ளதாக, ஏர் கனடா தெரிவித்திருந்தது.

இந்தப் பிரச்னை சைபர் தாக்குதலாலோ செயற்கை நுண்ணறிவாலோ (ஏஐ) ஏற்பட்டதாகத் தெரியவில்லை என்று அமெரிக்க அதிபர் டொனால்ட் டிரம்ப் ஃபாக்ஸ் நியூஸ் ஊடகத்திடம் தெரிவித்துள்ளார்.

இது மற்றொரு '9/11' சம்பவம் அல்ல என்று மார்க்வெய்ன் முல்லின் மீண்டும் மீண்டும் வலியுறுத்தினார்.

முன்னதாக, பாதுகாப்பு தொடர்பான கவலைகளைச் சுட்டிக்காட்டிய அமெரிக்க விமானப் போக்குவரத்துத் துறை அதிகாரிகள், இதை "அசாதாரணமான சூழ்நிலை" என்று குறிப்பிட்டு அனைத்து விமானங்களையும் தரையிறக்க உத்தரவிட்டிருந்தனர்.

வெள்ளை மாளிகையில் நடைபெற்ற செய்தியாளர் சந்திப்பில் பேசிய மார்க்வெய்ன் முல்லின், முந்தைய நாள் பலரும் எதிர்கொண்ட மைக்ரோசாஃப்ட் சேவைத் தடைக்கும் இந்தத் தொழில்நுட்பக் கோளாறுக்கும் தொடர்பு இருப்பதாகக் கூறப்படும் கருத்துகளை மறுத்தார்.

அனைவரின் பாதுகாப்பையும் உறுதி செய்வதற்கும், விமான நிலையங்களில் சிக்கியுள்ள பயணிகளுக்கு உதவுவதற்கும் அமெரிக்க அரசு முன்னெப்போதும் இல்லாத வேகத்தில் செயல்பட்டு வருவதாக முல்லின் கூறியிருந்தார்.

"பொதுமக்களுக்கு ஒருபோதும் ஆபத்து ஏற்படவில்லை. யாருடைய உயிருக்கும் ஒருபோதும் அச்சுறுத்தல் இருக்கவில்லை," என்று அவர் கூறினார்.

இந்தப் பிரச்னைக்குக் காரணம் என்ன?

அமெரிக்க விமானப் போக்குவரத்துக் கட்டுப்பாட்டு தகவல் தொடர்பு அமைப்பில் ஏற்பட்ட கோளாறு, அந்த அமைப்பின் நெட்வொர்க்கில் மேற்கொள்ளப்பட்ட புதுப்பித்தல் நடவடிக்கையால் ஏற்பட்டதாக சிபிஎஸ் செய்தி வெளியிட்டுள்ளது.

நாடு முழுவதும் விமானங்கள் நிறுத்தப்படுவதற்குக் காரணமான தொழில்நுட்பக் கோளாறு, அமெரிக்க விமானப் போக்குவரத்துக் கட்டுப்பாட்டு அமைப்பை இணைக்கும் தனியார் தகவல் தொடர்பு நெட்வொர்க்கில் மேற்கொள்ளப்பட்ட புதுப்பித்தலால் ஏற்பட்டதாக அதிகாரிகளை மேற்கோள்காட்டி சிபிஎஸ் செய்தியில் தெரிவிக்கப்பட்டுள்ளது.

இந்த நெட்வொர்க்கை எல்3ஹாரிஸ் நிறுவனம் இயக்கி வருவதாகக் சிபிஎஸ் செய்தி கூறுகிறது.

நெட்வொர்க்கில் புதுப்பித்தல் மேற்கொள்ளப்பட்டதைத் தொடர்ந்து, அது மறுதொடக்கம் செய்யப்பட்டு, பின்னர் செயலிழந்ததாக சிபிஎஸ் தெரிவித்துள்ளது.

உலகின் அதிநவீன வான்வெளி, ஆயுத அமைப்புகள், கட்டளை மற்றும் கட்டுப்பாட்டுத் தளங்களுக்கான தகவல் தொடர்பு அமைப்புகளை வழங்குவதில் முன்னணி நிறுவனமாகத் திகழ்வதாக எல்3ஹாரிஸ் தனது இணையதளத்தில் குறிப்பிட்டுள்ளது.

இதுகுறித்து பிபிசி விளக்கம் கேட்டபோது, எல்3ஹாரிஸ் நிறுவனம் உடனடியாகப் பதிலளிக்கவில்லை.

இதற்கிடையே, ஆஸ்திரேலியாவின் சிட்னி நகரில் உள்ள சர்வதேச விமான நிலையத்தில் இருந்து அமெரிக்காவுக்குச் செல்லும் அனைத்து விமானச் சேவைகளும் தற்காலிகமாக நிறுத்தப்பட்டுள்ளது என அந்த நாட்டின் மிகப்பெரிய சர்வதேச விமான நிலையம் தெரிவித்துள்ளதாக, ஆஸ்திரேலியாவிலிருந்து பிபிசி செய்தியாளர் சைமன் அட்கின்சன் தெரிவித்துள்ளார்.

2023-ஆம் ஆண்டிலும் அமெரிக்கா முழுவதும் விமானச் சேவைகள் பாதிக்கப்பட்டன

அமெரிக்காவில் விமானங்கள் நாடு முழுவதும் நிறுத்தப்பட்டுள்ள இந்தச் சம்பவம், இதற்கு முன்பு நிகழ்ந்த இதேபோன்ற சம்பவங்களுடன் ஒப்பிடப்படுவதாக, பிபிசி வெரிஃபை செய்தியாளர் ஜாக் ஹார்டன் தெரிவித்துள்ளார்.

அமெரிக்காவில் விமானச் சேவைகள் நாடு முழுவதும் நிறுத்தப்பட்டது தொடர்பாக நடைபெற்ற செய்தியாளர் சந்திப்பில், இது 9/11 தாக்குதலைப் போன்ற சம்பவம் அல்ல என்று உள்நாட்டுப் பாதுகாப்புத் துறை அமைச்சர் மார்க்வெய்ன் முல்லின் மீண்டும் மீண்டும் தெரிவித்தார்.

இதுபோன்ற சம்பவங்கள் குறித்து பிபிசி வெரிஃபை, கிரான்ஃபீல்ட் பல்கலைக்கழகத்தின் விமானப் போக்குவரத்து மற்றும் சுற்றுச்சூழல் துறை இணைப் பேராசிரியர் டாக்டர் கை கிராட்டனிடம் பேசியது.

"9/11 தாக்குதலுக்குப் பிறகு ஏற்பட்டுள்ள மிகத் தீவிரமான சம்பவமாக இது தோன்றுகிறது. ஆனால், அந்த அளவுக்கு இது தீவிரமானது அல்ல," என்று அவர் கூறினார்.

இதற்கு முன்பு இதேபோன்ற சம்பவங்கள் நிகழ்ந்துள்ளனவா என்று கேட்கப்பட்டபோது, 2023-ஆம் ஆண்டு அமெரிக்காவில் ஏற்பட்ட ஒரு சம்பவத்தை டாக்டர் கிராட்டன் சுட்டிக்காட்டினார்.

அப்போது, விமானங்களுக்கான அறிவிப்புகள் வழங்கும் அமைப்பில் ஏற்பட்ட கோளாறு காரணமாக விமானச் சேவைகள் நிறுத்தப்பட்டன.

"அந்த நிலைமை 1 மணி நேரம் 52 நிமிடங்கள் நீடித்தது. அந்தக் காலகட்டத்தில் சுமார் 9,500 விமானங்கள் தாமதமடைந்தன. சுமார் 1,300 விமானங்கள் ரத்து செய்யப்பட வேண்டியிருந்தது" என்று அவர் தெரிவித்தார்.

இந்த அமைப்பில் ஏற்பட்ட கோளாறு காரணமாக, விமானப் போக்குவரத்துப் பாதுகாப்பு தொடர்பான அறிவிப்புகளை வெளியிட முடியவில்லை. அமைப்பு மீண்டும் செயல்பாட்டுக்கு வரும் வரை விமானச் சேவைகள் நிறுத்தப்பட்டன.

- இது, பிபிசிக்காக கலெக்டிவ் நியூஸ்ரூம் வெளியீடு