89 ரன்னுக்கு ஆல்அவுட்: கோலி, ரோகித் இருந்தும் இந்தியா படுதோல்வி ஏன்? நிபுணர்கள் கருத்து

ஒருநாள் சர்வதேச கிரிக்கெட் வரலாற்றில் ரன் வித்தியாசத்தில் தனது இரண்டாவது மிகப்பெரிய தோல்வியை இந்திய அணி சந்தித்துள்ளது.

வெள்ளிக்கிழமை (நவம்பர் 13) மவுண்ட் மாங்கனுயில் உள்ள பே ஓவல் மைதானத்தில் நடைபெற்ற நான்காவது ஒருநாள் போட்டியில், இந்தியாவை 244 ரன்கள் வித்தியாசத்தில் நியூசிலாந்து வீழ்த்தியது.

334 ரன்கள் என்ற இலக்கை நோக்கி விளையாடிய இந்திய அணி, 26.4 ஓவர்களில் 89 ரன்களுக்கு அனைத்து விக்கெட்டுகளையும் இழந்தது. இந்தத் தோல்விக்குப் பிறகும் ஐந்து போட்டிகள் கொண்ட தொடரில் இந்தியா 2-1 என்ற கணக்கில் முன்னிலை வகிக்கிறது.

இந்திய அணியின் இன்னிங்ஸின் முதல் ஓவரிலேயே ரோஹித் சர்மா, விராட் கோலி, அணித் தலைவர் ஸ்ரேயஸ் ஐயர் ஆகிய மூவரின் விக்கெட்டுகளையும் நியூசிலாந்து வேகப்பந்துவீச்சாளர் ஹென்றி வீழ்த்தினார்.

போட்டிக்குப் பிறகு பேசிய இந்திய அணியின் தலைமைப் பயிற்சியாளர் கௌதம் கம்பீர், அணியின் பேட்டிங் செயல்பாடு கவலையளிப்பதாகத் தெரிவித்தார்.

சவாலான சூழல்களுக்கு ஏற்ப பேட்ஸ்மேன்கள் தங்களைத் தயார்படுத்திக் கொள்ள வேண்டும் என்று அவர் கூறினார். நியூசிலாந்து பந்துவீச்சாளர்கள் சரியான திசையிலும் அளவிலும் பந்துவீசியதே இந்திய பேட்ஸ்மேன்களுக்கு அதிக சிரமத்தை ஏற்படுத்தியதாக கம்பீர் குறிப்பிட்டார்.

அதே நேரத்தில், நியூசிலாந்தின் சிறப்பான பந்துவீச்சே அந்த அணியின் வெற்றிக்குக் காரணம் என்று இந்திய அணித் தலைவர் ஸ்ரேயஸ் ஐயர் பாராட்டினார்.

'தொழில்நுட்ப விவரங்களுக்குள் செல்ல விரும்பவில்லை'

போட்டிக்குப் பிறகு நடைபெற்ற செய்தியாளர் சந்திப்பில், 'வாபிள் சீம்' முறையில் வீசப்பட்ட பந்துகளை எதிர்கொள்வதில் இந்திய பேட்ஸ்மேன்கள் ஏன் தடுமாறினார்கள் என்று தலைமைப் பயிற்சியாளர் கௌதம் கம்பீரிடம் கேள்வி எழுப்பப்பட்டது.

'வாபிள்' என்ற ஆங்கிலச் சொல்லுக்கு அசைவது அல்லது தள்ளாடுவது என்று பொருள். இந்த முறையில் பந்துவீசும்போது பந்தின் தையல் பகுதி சீராக இல்லாமல் சற்றே அசையும். இதனால், ஆடுகளத்தில் பட்ட பிறகு பந்து எந்தத் திசையில் நகரும் என்பதைக் கணிப்பது பேட்ஸ்மேன்களுக்குச் சிரமமாகலாம்.

இதற்கு பதிலளித்த கம்பீர், "தொழில்நுட்ப விவரங்களுக்குள் செல்ல விரும்பவில்லை. பந்து பெரிய அளவில் நகரவில்லை. பந்தின் அசைவைக் கையாள வேண்டியது பேட்ஸ்மேன்களின் வேலை. தையல் பகுதியின் அசைவைவிட, பந்துவீச்சாளர்கள் வீசிய சரியான அளவும் திசையும்தான் எங்களுக்குச் சிரமத்தை ஏற்படுத்தின. எங்கள் பேட்ஸ்மேன்கள் கிரீஸிலேயே நின்றுவிட்டனர்" என்று கூறினார்.

முந்தைய போட்டியையும் சுட்டிக்காட்டிய அவர், அணி தொடர்ந்து விக்கெட்டுகளை இழப்பது கவலைக்குரிய விஷயம் என்று தெரிவித்தார்.

இத்தகைய சூழல்களை எதிர்கொள்வதற்கு பேட்ஸ்மேன்கள் மனணரீதியாகவும் தொழில்நுட்ப ரீதியாகவும் தயாராக இருக்க வேண்டும் என்று கம்பீர் குறிப்பிட்டார்.

"எங்களிடம் அனுபவமிக்க வீரர்கள் இருக்கிறார்கள். கடைசிப் போட்டியில் அவர்கள் சிறப்பாகச் செயல்படுவார்கள் என்று நம்புகிறோம்" என்றும் அவர் கூறினார்.

ஃபீல்டிங் தவறுகள் குறித்தும் கம்பீர் கவலை

மேட் ஹென்றியின் பந்துவீச்சைப் பாராட்டிய கௌதம் கம்பீர், அவர் வீசிய பந்துகளை எதிர்கொள்ளவே முடியாது என்ற கருத்தை ஏற்க மறுத்தார்.

இந்திய அணியில் அனுபவமிக்க பேட்ஸ்மேன்கள் இருப்பதால், இத்தகைய பந்துவீச்சை அவர்கள் எதிர்கொள்ளத் தெரிந்திருக்க வேண்டும் என்று கம்பீர் கூறினார்.

"சர்வதேச கிரிக்கெட்டில் விளையாடவே முடியாத பந்து என்று எதுவுமில்லை. மேட் ஹென்றி சரியான பகுதிகளில் பந்துவீசினார். ஆனால், அதை எப்படி எதிர்கொள்வது என்பதை நாம் அறிந்திருக்க வேண்டும். ஒட்டுமொத்த அணியும் 90 ரன்களை ஒட்டியே ஆட்டமிழந்தால், கவலை ஏற்படுவது இயல்புதான். அதுவும் உலகக் கோப்பை நெருங்கும் நேரத்தில் இவ்வாறு நடப்பது கவலையளிக்கிறது. முந்தைய போட்டியிலும் ஏழு விக்கெட்டுகளை இழந்திருந்தோம். இதுவும் கவலைக்குரியது" என்று அவர் தெரிவித்தார்.

ஃபீல்டிங்கில் நடந்த தவறுகள் குறித்தும் கம்பீர் கவலை தெரிவித்தார். குறிப்பாக, நியூசிலாந்து அணிக்காகச் சதம் அடித்த வில் யங்குக்கு எதிராக இரண்டு கேட்சுகளை இந்திய வீரர்கள் தவறவிட்டதை அவர் சுட்டிக்காட்டினார்.

அந்த வாய்ப்புகளைப் பயன்படுத்திக் கொண்ட வில் யங், 125 ரன்கள் குவித்து நியூசிலாந்து அணி 333 ரன்களை எட்டுவதில் முக்கியப் பங்காற்றினார்.

இந்திய அணித் தலைவர் ஸ்ரேயஸ் ஐயர் கூறியது என்ன?

இதனிடையே, தோல்விக்குப் பிறகு பேசிய அணித் தலைவர் ஸ்ரேயஸ் ஐயர், எந்த வீரரும் கவனக்குறைவாகத் தனது விக்கெட்டை இழக்கவில்லை என்றும், நியூசிலாந்து பந்துவீச்சாளர்கள் மிகச் சிறப்பாகச் செயல்பட்டதாகவும் கூறினார்.

"முதல் இன்னிங்சுக்கும் இரண்டாவது இன்னிங்சுக்கும் இடையே ஆடுகளம் செயல்பட்ட விதத்தில் பெரிய வேறுபாடு இருந்தது. அதே நேரத்தில் மேட் ஹென்றிக்கும் பாராட்டு அளிக்க வேண்டும். முதல் பந்திலிருந்தே அவர் சரியான பகுதிகளில் பந்துவீசினார். அவரது செயல்பாடு அபாரமாக இருந்தது" என்று ஸ்ரேயஸ் தெரிவித்தார்.

நியூசிலாந்து அணியின் இன்னிங்ஸின் போது இந்திய அணி பல்வேறு பந்துவீச்சு உத்திகளைக் கையாண்டதாகவும், ஆனால் எதிரணி பேட்ஸ்மேன்கள் அவற்றைச் சிறப்பாக எதிர்கொண்டதாகவும் அவர் ஒப்புக்கொண்டார். கேட்ச்சுகளைத் தவறவிட்டதும் தோல்விக்கு ஒரு காரணம் என்று குறிப்பிட்டார்.

"முதல் இன்னிங்ஸில் நாங்கள் கிட்டத்தட்ட எல்லா முயற்சிகளையும் மேற்கொண்டோம். நியூசிலாந்து பேட்ஸ்மேன்கள் மிகவும் சிறப்பாக விளையாடினர். அவர்கள் 330 ரன்களுக்கு மேல் எடுத்ததால், பேட்டிங் செய்வதற்கு ஆடுகளம் இன்னும் சாதகமாக மாறியிருக்கும் என்றும், இலக்கை எட்டிவிடலாம் என்றும் நினைத்தோம். சில கேட்ச்சுகளைத் தவறவிட்டோம். ஆனால், கிரிக்கெட்டில் அவ்வாறு நடப்பதுண்டு" என்று ஐயர் கூறினார்.

"டிரெஸ்ஸிங் அறைக்குச் சென்றபோது இலக்கை எளிதாக எட்டிவிடுவோம் என்று நினைத்தோம். ஆனால், பந்து ஆடுகளத்தில் பட்ட பிறகு உள்ளேயும் வெளியேயும் நகர்ந்த விதத்தால், அதை எப்படிச் சந்திப்பது என்பதைப் பேட்ஸ்மேன்களால் முன்கூட்டியே தீர்மானிக்க முடியவில்லை. விக்கெட்டுகள் வீழ்ந்த விதத்தைப் பார்த்தால், யாரும் தங்கள் விக்கெட்டை வீணாகப் பறிகொடுக்கவில்லை என்பது தெரியும். நியூசிலாந்து பந்துவீச்சாளர்கள் சிறப்பாகப் பந்துவீசினர்" என்றும் அவர் தெரிவித்தார்.

இந்தத் தோல்வியை மறந்துவிட்டு அடுத்த போட்டியில் கவனம் செலுத்துமாறு இந்திய வீரர்களை ஸ்ரேயஸ் ஐயர் கேட்டுக்கொண்டார்.

"இந்தப் போட்டியை மறந்துவிட்டு அடுத்த கட்டத்துக்குச் செல்வது முக்கியம். பந்துவீச்சிலும் பேட்டிங்கிலும் என்ன தவறுகள் நடந்தன என்பதை ஆராய வேண்டும். அதே நேரத்தில், நாம் ஏற்கெனவே இரண்டு போட்டிகளில் வெற்றி பெற்றிருக்கிறோம் என்பதையும் நினைவில் கொள்ள வேண்டும். அந்த வெற்றிகளிலிருந்து உத்வேகம் பெற்று, புதிய மனநிலையுடனும் நேர்மறையான அணுகுமுறையுடனும் அடுத்த போட்டியை எதிர்கொள்ள வேண்டும்" என்று அவர் கூறினார்.

'எங்கள் இலக்கு இன்னும் பெரிதாக இருந்தது' - நியூசிலாந்து கேப்டன்

244 ரன்கள் வித்தியாசத்தில் கிடைத்த மிகப்பெரிய வெற்றி குறித்து நியூசிலாந்து அணித் தலைவர் மிட்செல் சான்ட்னர் மகிழ்ச்சி தெரிவித்தார்.

வில் யங்கின் சதத்தைப் பாராட்டிய அவர், அணி வலுவான ஸ்கோரை எட்டுவதில் யங் முக்கியப் பங்காற்றியதாகக் கூறினார்.

எனினும், 360 ரன்களை எட்ட வேண்டும் என்பதே நியூசிலாந்து அணியின் எண்ணமாக இருந்ததாகவும், பேட்ஸ்மேன்கள் இன்னும் கூடுதல் ரன்கள் சேர்த்திருக்க வாய்ப்பு இருந்ததாகவும் சான்ட்னர் குறிப்பிட்டார்.

மேட் ஹென்றியின் பந்துவீச்சையும் பாராட்டிய அவர், இந்தப் போட்டியில் விளையாட ஹென்றி மிகுந்த ஆர்வத்துடன் இருந்ததாகக் கூறினார். புதிய பந்தைப் பயன்படுத்தி ஆடுகளத்தின் தன்மைக்கேற்ப பந்துவீசுவதற்கு ஏற்ற வீரர் ஹென்றி என்றும் அவர் தெரிவித்தார்.

ஞாயிற்றுக்கிழமை நடைபெறவுள்ள அடுத்த போட்டிக்கான உத்திகள், ஆடுகளம் மற்றும் சூழலை மதிப்பிட்ட பிறகு முடிவு செய்யப்படும் என்றும் சான்ட்னர் கூறினார்.

தினேஷ் கார்த்திக், சோப்ரா, அஜய் ஜடேஜா கூறியது என்ன?

இந்திய சுழற்பந்துவீச்சாளர் குல்தீப் யாதவ் இந்தப் போட்டியில் சிறப்பாகச் செயல்படவில்லை. எட்டு ஓவர்கள் வீசிய அவர், 73 ரன்களை விட்டுக்கொடுத்ததுடன் விக்கெட் எதையும் வீழ்த்தவில்லை.

குல்தீப்பின் பந்துவீச்சு குறித்துப் பேசிய இந்திய அணியின் முன்னாள் விக்கெட் கீப்பர்-பேட்ஸ்மேன் தினேஷ் கார்த்திக், பந்துவீச ஓடிவரும் விதத்திலும், பந்தைக் கையிலிருந்து விடுவிக்கும் முறையிலும் அவர் முன்னேற்றம் காணலாம் என்று கூறினார்.

இன்னிங்ஸ் இடைவேளையின்போது கிரிக்பஸ் ஊடகத்திடம் பேசிய தினேஷ் கார்த்திக், "குல்தீப் தனது ரன்-அப் மற்றும் பந்தை விடுவிக்கும் முறையில் அதிக கவனம் செலுத்த வேண்டும். ஆனால், நீண்டகாலமாக ஆடும் பதினொருவர் அணியில் இடம்பெறாமல் இருந்த பிறகு, சர்வதேசப் போட்டியில் திடீரெனச் சிறப்பாகச் செயல்படுவது எளிதல்ல" என்று தெரிவித்தார்.

இதனிடையே, நியூசிலாந்துக்கு எதிரான நான்காவது ஒருநாள் போட்டிக்கான ஆடும் பதினொருவர் அணியில் முகமது சிராஜ் இடம்பெறாதது குறித்து இந்திய அணியின் முன்னாள் வீராங்கனை அஞ்சும் சோப்ரா கேள்வி எழுப்பினார்.

சோனி ஸ்போர்ட்ஸ் தொலைக்காட்சியில் நடைபெற்ற கலந்துரையாடலில், அனுபவமிக்க வேகப்பந்துவீச்சாளரான சிராஜுக்கு வாய்ப்பு வழங்கப்படாதது நியாயமற்றது என்று அவர் கூறினார்.

நல்ல ஃபார்மில் இருந்த சிராஜ் அணியில் இடம்பெற்றிருந்த போதும், களத்தில் விளையாட வாய்ப்பு வழங்கப்படவில்லை என்பது அஞ்சும் சோப்ராவின் கருத்தாக இருந்தது.

அதே கலந்துரையாடலில் பங்கேற்ற இந்திய அணியின் முன்னாள் ஆல்ரவுண்டர் அஜய் ஜடேஜாவும், நான்காவது ஒருநாள் போட்டியில் சிராஜுக்கு வாய்ப்பு வழங்கப்படாதது குறித்து ஆச்சரியம் தெரிவித்தார்.

டெஸ்ட் தொடருக்குத் தயாராகும் வகையில் மற்ற டெஸ்ட் வீரர்கள் ஏற்கெனவே அணியிலிருந்து விடுவிக்கப்பட்டிருந்த போதும், சிராஜ் மட்டும் ஒருநாள் போட்டிகளுக்கான அணியிலேயே தக் வைக்கப்பட்டிருந்ததை அவர் சுட்டிக்காட்டினார்.

இதனால், கடைசி இரண்டு ஒருநாள் போட்டிகளில் ஏதேனும் ஒன்றில் சிராஜுக்கு வாய்ப்பு வழங்கப்படலாம் என்ற எதிர்பார்ப்பு இருந்ததாக அவர் கூறினார்.

இருப்பினும், சிராஜுக்கு லேசான காயமோ வேறு ஏதேனும் பிரச்னையோ இருந்தால், அவரைக் களமிறக்கும் அபாயத்தை அணி நிர்வாகம் ஏற்க விரும்பாமல் இருக்கலாம் என்றும் ஜடேஜா குறிப்பிட்டார்.

அடுத்த போட்டியில் சிராஜுக்கு வாய்ப்பு அளிக்க அணி நிர்வாகம் திட்டமிட்டிருக்கலாம் என்றும் அவர் தெரிவித்தார். சிராஜ் புதிய வீரர் அல்ல; அவரது திறமை குறித்து எந்தச் சந்தேகமும் இல்லை என்பதே ஜடேஜாவின் கருத்து.

நியூசிலாந்துக்கு கவாஸ்கர் பாராட்டு

சோனி ஸ்போர்ட்ஸ் தொலைக்காட்சியில் நடைபெற்ற கலந்துரையாடலில், இந்திய அணியின் முன்னாள் தலைவர் சுனில் கவாஸ்கர் நியூசிலாந்தின் சிறப்பான வெற்றியைப் பாராட்டினார்.

இந்தப் போட்டியில் ஃபாலோ-ஆன் என்ற நடைமுறை இருந்திருந்தால், ரோஹித் சர்மாவும் விராட் கோலியும் மீண்டும் பேட்டிங் செய்வதைப் பார்க்க ரசிகர்களுக்கு வாய்ப்பு கிடைத்திருக்கும் என்று அவர் நகைச்சுவையாகக் குறிப்பிட்டார்.

"நியூசிலாந்து 244 ரன்கள் வித்தியாசத்தில் வென்றுள்ளது. இது மிகப்பெரிய வெற்றி. நாங்கள் அனைவரும் ஓய்வறையில் அமர்ந்து, 'ஃபாலோ-ஆன் இருந்திருந்தால் ரோஹித்தும் விராட்டும் மீண்டும் பேட்டிங் செய்வதைப் பார்க்க ஒரு வாய்ப்பு கிடைத்திருக்கும்' என்று நகைச்சுவையாகப் பேசிக் கொண்டிருந்தோம். இன்னும் ஒரு போட்டி மீதமுள்ளது" என்று கவாஸ்கர் கூறினார்.

இந்திய பேட்ஸ்மேன்களின் விக்கெட்டுகளை வீழ்த்தியதற்கு நியூசிலாந்து பந்துவீச்சாளர்களின் துல்லியமான பந்துவீச்சே காரணம் என்று அவர் பாராட்டினார்.

ஸ்ரேயஸ் ஐயரின் கருத்தை ஏற்றுக்கொண்ட கவாஸ்கர், இந்திய வீரர்கள் தங்கள் விக்கெட்டுகளை எளிதாகப் பறிகொடுக்கவில்லை என்றும் தெரிவித்தார்.

மேட் ஹென்றி துல்லியமான திசையிலும் அளவிலும் பந்துவீசியதாலும், பந்தை அவர் நகரச் செய்த விதத்தாலும் பேட்டிங் செய்வது எளிதாக இருக்கவில்லை என்று கவாஸ்கர் கூறினார்.

அவ்வப்போது பவுன்சர் பந்துகளையும் ஹென்றி பயன்படுத்தியது பேட்ஸ்மேன்களின் சிரமத்தை மேலும் அதிகரித்ததாக அவர் குறிப்பிட்டார்.

"பந்துவீச்சு மிகவும் சிறப்பாக இருந்தது. மேட் ஹென்றியின் லைன் மற்றும் லெந்த் அபாரமாக இருந்தன. அவர் பந்தை நன்றாக நகரச் செய்தார். அவ்வப்போது பவுன்சர்களையும் வீசினார். இத்தகைய சூழலில் பேட்டிங் செய்வது எளிதல்ல. ஸ்ரேயஸ் கூறியதுபோல, இந்திய வீரர்கள் யாரும் தங்கள் விக்கெட்டை வீணாகப் பறிகொடுக்கவில்லை. சிறப்பாக வீசப்பட்ட பந்துகளில்தான் பேட்ஸ்மேன்கள் ஆட்டமிழந்தனர். கிரிக்கெட்டில் பல நேரங்களில் இப்படித்தான் நடக்கும்" என்று கவாஸ்கர் கூறினார்.

- இது, பிபிசிக்காக கலெக்டிவ் நியூஸ்ரூம் வெளியீடு