ஏஐ துறையில் முன்னோடியான ஜென்சன் ஹுவாங், காதல் உறவுகளில் எடுத்த தவறான முடிவுகளால் வீழ்ச்சியை சந்தித்தது எப்படி?

வெற்றிகரமான ஏஐ சிப் நிறுவனமான என்விடியாவை இணைந்து தொடங்கிய ஜென்சன் ஹுவாங், ஆரம்பம் முதலே கடுமையாக உழைத்து நிறுவனத்தை வளர்த்தெடுத்தார். பல நெருக்கடியான காலங்களிலும் சோர்வின்றி, விடாமுயற்சியுடன் நிறுவனத்தை வழிநடத்தினார். ஆனால், இறுதியில் தனது சொந்தக் காதல் வாழ்க்கையால் சிக்கலில் மாட்டிக்கொண்டுள்ளார்.

எதிர்காலத் தொழில்நுட்பத்தில் கவனம் செலுத்தும் ஒரு நிறுவனத்தில் இப்படியொரு பழைய பாணியிலான கதை நடந்திருப்பது ஆச்சரியமளிக்கிறது.

திருமணமான பெண் சக ஊழியருடன் கோல்ட்பிளேவின் 'கிஸ் கேம்' கேமராவில் ஹுவாங் சிக்கியது போன்றும், துரோகத்தைப் பற்றிய ஜார்ஜ் மைக்கேலின் பிரபல பாடலான கேர்லஸ் விஸ்பர்-ஐ அவர் பாடுவது போன்றும் பல மீம்கள் வைரலாகின.

இதில் வேடிக்கை என்னவென்றால், இந்த இரண்டு மீம்களுமே அவர் உருவாக்க உதவி செய்த அதே ஏஐ தொழில்நுட்பத்தைப் பயன்படுத்தித்தான் உருவாக்கப்பட்டன.

இந்த வாரம் சிலிக்கான் வேலியைச் சேர்ந்த இரண்டு நிறுவன உயர் அதிகாரிகளைச் சந்தித்து, இந்தச் செய்தியை அவர்கள் எப்படிப் பார்க்கிறார்கள் என்று கேட்டேன். அதற்கு அவர்கள், "மீம்கள் மூலமாகத்தான்!" என்று பதிலளித்தனர்.

ஆனால், அவர் உறவின் காரணமாக ஹுவாங் தனது பதவியை ராஜினாமா செய்ய வேண்டிய நிலை வரும் என்று அவர்கள் நம்பவில்லை.

அவர்களைப் பொறுத்தவரை, இதில் இழப்பதற்கு நிறைய இருக்கிறது. ஏனென்றால், வெற்றிகரமாகச் செயல்பட்டு வரும் தற்போதைய முறையை மாற்ற முடியாத அளவுக்கு, ஒட்டுமொத்த ஏஐ துறையும் என்விடியா சிப்களையே அதிகம் நம்பியிருக்கிறது.

வேறு வார்த்தைகளில் சொன்னால் , சிலிக்கான் வேலி ஹுவாங்குக்கு ஆதரவாக இருந்தது.

ஆனால், இரண்டாவது காதல் விவகாரம் குறித்த வதந்திகள் பரவின. இந்த முறை அது அவரது பெண் சக ஊழியருடன் தொடர்புடையது. இதையடுத்து, அவர் எல்லை மீறிவிட்டதாக நிறுவனத்தின் நிர்வாகக் குழு முடிவு செய்தது.

இதனால், தவறான முடிவுகளை எடுத்து அதை மறைப்பவர் என்ற பார்வை அவர் மீது உருவானது.

ஹுவாங்கின் வாழ்க்கை வரலாற்றை எழுதிய ஸ்டீஃபன் விட், பிபிசியிடம் கூறுகையில், "அவர் தனது மனைவியைப் பற்றி எப்போதும் பெருமையாகப் பேசுவார். அவரைப் பற்றி மிகவும் உயர்வாகப் பேசுவார்" என்று தெரிவித்தார்.

"எந்தக் குடும்பத்துக்கும் இது பெரிய பாதிப்பை ஏற்படுத்தியிருக்கும். ஆனால், குடும்பத்தின் மீது அதிக அக்கறை கொண்டவர் என்று பெயரெடுத்த ஹுவாங்குக்கு இது இன்னும் பெரிய பாதிப்பு. அவரது இரண்டு பிள்ளைகளுமே என்விடியாவில் வேலை செய்கிறார்கள்" என்று விட் கூறினார்.

கூட்டத்திலிருந்து தனித்துத் தெரிய வேண்டும் என்பதில் ஹுவாங் எப்போதும் ஆர்வமாக இருந்தார்.

கொரோனா ஊரடங்கு காலத்தில், தனது சமையலறையில் இருந்தபடியே நேரலையில் உரையாற்றினார் ஹுவாங். அந்தச் சம்பவம் இணையத்தில் பிரபலமானது. ஆனால், பின்னர் அது ஏஐ மூலம் உருவாக்கப்பட்டது என்பது தெரியவந்தது.

லெதர் ஜாக்கெட் அணியாமல் ஹுவாங்கை பார்ப்பது அரிது. தன்னிடம் ஒரே ஒரு சூட் மட்டுமே இருப்பதாகவும், தனது மகளின் காதலருடைய டை-யைத்தான் அணிவதாகவும் அவர் நகைச்சுவையாகக் கூறியுள்ளார்.

ஹுவாங், உலகின் முக்கியப் பிரபலங்கள் மற்றும் தலைவர்களுடன் நெருங்கிப் பழகி வந்தார். அமெரிக்க அதிபர் டொனால்ட் டிரம்ப், ஈலோன் மஸ்க், பிரிட்டன் அரசர் மூன்றாம் சார்லஸ் ஆகியோரும் அவரது நட்பு வட்டத்தில் உள்ளனர்.

கடந்த ஆண்டு லண்டனில் உள்ள செயின்ட் ஜேம்ஸ் அரண்மனையில் அவரைச் சந்தித்ததுதான் கடைசி முறை. அப்போது அவருக்கு மதிப்புமிக்க குயின்ஸ் இன்ஜினியரிங் விருது வழங்கப்பட்டது.

அவர் செய்தியாளர்களிடம் பேசமாட்டார் என்று என்னிடம் முன்பே கூறியிருந்தார்கள். ஆனால், அவராகவே என்னிடம் வந்து பேசினார். அங்கிருந்த செய்தித் தொடர்பாளர்கள் பதற்றத்துடன் எங்களைக் கவனித்துக் கொண்டிருக்க, நாங்கள் சுமார் 10 நிமிடங்கள் பேசினோம். ஏஐ துறையின் வளர்ச்சி குறித்தும், அதில் பிரிட்டனின் பங்கு குறித்தும் அவர் தெளிவாக பேசினார்.

பலருக்கு, ஹுவாங்தான் என்விடியா நிறுவனத்தின் அடையாளமாக இருந்தார். அவருக்குக் கீழ் நேரடியாக சுமார் 200 பேர் பணியாற்றி வந்தனர்.

நிறுவனத்தில் வேலை செய்ய உயர்ந்த தரம் எதிர்பார்க்கப்பட்டது. ஆனால், நிறுவனத்தின் உள்செயல்பாடுகள் குறித்து 'தி என்விடியா வே' என்ற புத்தகத்தை எழுதிய டே கிம், அங்கு வேலை நேரம் மிகவும் அதிகமாக இருந்ததாகக் குறிப்பிட்டுள்ளார்.

ஹுவாங் ஊழியர்களின் தவறுகளை வெளிப்படையாகவும் கடுமையாகவும் விமர்சிப்பார். அனைத்து ஊழியர்களும் பங்கேற்கும் கூட்டங்களில்கூட, தனிப்பட்ட ஊழியர்கள் செய்த தவறுகளைச் சுட்டிக்காட்ட அவர் தயங்கியதில்லை.

இப்போது அவரது சொந்தத் தவறு பொதுவெளியில் அம்பலமாகியுள்ளது.

இதனால், அவரது தொழில் வாழ்க்கை கடுமையான முடிவைச் சந்தித்துள்ளது.

ஹுவாங் இல்லாத என்விடியா

இடைக்காலப் பொறுப்பை ஏற்கும் கோலெட் கிரெஸ், நிறுவனத்தில் ஏற்கெனவே நன்கு அறியப்பட்டவர். இது என்விடியாவில் உள்ள சிலருக்கு நிம்மதியளிக்கும்.

அவர் என்விடியாவில் 13 ஆண்டுகளாகப் பணியாற்றி வருகிறார். நிறுவனத்தின் வருவாய் குறித்த கூட்டங்களிலும் தொடர்ந்து பங்கேற்று வருகிறார். பல மில்லியன் டாலர் சொத்துகளைக் கொண்ட அவர், தொழில்நுட்பத் துறையில் வெற்றிகரமான நிர்வாகியாகவும் இருக்கிறார்.

ஆனால், அவர் ஒரு பொறியாளர் கிடையாது. அதேசமயம், என்விடியாவின் தயாரிப்புகள் மிகவும் தொழில்நுட்பம் சார்ந்தவை.

என்விடியா வழக்கம்போல தொடர்ந்து செயல்படும் என்றும், அதன் தொழில்நுட்ப வளர்ச்சி அதே வேகத்தில் தொடரும் என்றும் முதலீட்டாளர்களுக்கு அவர் நம்பிக்கை அளிக்க வேண்டும். ஹுவாங் வெளியேறுவதால் முக்கிய ஊழியர்களும் நிறுவனத்தை விட்டு வெளியேற மாட்டார்கள் என்பதையும் உறுதிப்படுத்த வேண்டும்.

என்விடியா நிறுவனம் தடுமாறினால், அது ஒட்டுமொத்த ஏஐ துறைக்கும் பாதிப்பை ஏற்படுத்தும். ஏனென்றால், தொடர்ந்து மேம்படுத்தப்படும் என்விடியா சிப்கள்தான் மிகவும் சக்திவாய்ந்த ஏஐ மாடல்களை இயக்குகின்றன.

ஹுவாங்கைப் பொறுத்தவரை, சீன உளவாளி எனக் குற்றம் சாட்டப்பட்ட பெண்ணுடனான அவரது தொடர்பு குறித்த விசாரணை தொடரும் என எதிர்பார்க்கப்படுகிறது. அதன் முடிவைப் பொறுத்தே அவர் அடுத்து என்ன செய்யப் போகிறார் என்பது தெரியவரும்.

அவரது நடவடிக்கைகள் சர்ச்சையை ஏற்படுத்தியிருந்தாலும், ஹுவாங்குக்கு புதிய வேலைவாய்ப்புகள் கிடைப்பதில் எந்தக் குறையும் இருக்காது. என்விடியாவின் போட்டி நிறுவனங்களும் தங்களுக்குப் போட்டியாக இருந்த ஒருவர் களத்திலிருந்து விலகியிருப்பதை நினைத்து மகிழ்ச்சியடைந்திருப்பார்கள். ஏற்கெனவே, ஸ்பேஸ்எக்ஸ் நிறுவனத்தில் அவருடன் இணைந்து பணியாற்றுவது பெருமைக்குரிய விஷயம் என்று ஈலோன் மஸ்க் தெரிவித்துள்ளார்.

ஆனால், ஹுவாங் தனது நிறுவனத்துக்கோ நாட்டுக்கோ துரோகம் செய்யவில்லை என்பது தெரியவந்தாலும், 41 ஆண்டுகளாகத் தனது மனைவியாக இருக்கும் லோரி ஹுவாங்குக்கு அவர் துரோகம் செய்துள்ளார் என்பதை மறந்துவிடக் கூடாது.

லோரி ஹுவாங்கை பொறுத்தவரை, இது தொழில்நுட்பம், ஆசை அல்லது கோடிக்கணக்கான மதிப்புள்ள நிறுவனத்தைப் பற்றிய கதை அல்ல.

இது அவரது தனிப்பட்ட வாழ்க்கையைப் பாதித்த மிகவும் வேதனையான விஷயம்.

- இது, பிபிசிக்காக கலெக்டிவ் நியூஸ்ரூம் வெளியீடு