Ateb y Galw: Nerys Stocks

Actores o dde Cymru yw Nerys Amber Stocks. Hi oedd yn chwarae'r prif gymeriad Maz yn y ffilm Out There ac mae hi hefyd wedi ymddangos mewn rhaglenni comedi fel Mammoth a Misguided. Yn ddiweddar iawn fe serennodd yn Phantasmagoria - ffilm fer arswyd seicolegol wedi ei ysgrifennu a cyfarwyddo gan Hanna Jarman.

Fe gymrodd Nerys saib o'i bywyd prysur i ateb cwestiynau busneslyd Cymru Fyw.

Mae fy atgof cyntaf o pan o'n i'n tua tair oed. Cael cacen lindys yn y feithrinfa ar gyfer fy mhen-blwydd a phawb yn canu i mi. Mae'n beth braidd yn randym i gofio, ond allan o bopeth yn y cyfnod yna – y gacen siocled sydd wedi aros yn y cof!

Fy hoff le yng Nghymru yw Pen-y-Fan. Roeddwn i'n ei gerdded gyda fy chwaer, felly mae'n le dwi'n cysylltu gydag atgof melys. Mae yna gymaint o synnwyr o gyflawniad pan ti'n cyrraedd y copa, ac mae'n werth yr holl ddringo jysd ar gyfer y golygfeydd. Rydw i hefyd yn hoffi meddwl am faint o bobl sydd wedi gwneud union yr un daith, a'u profiadau nhw ar hyd y ffordd. Mae'n un o'r llefydd 'na sy'n eich atgoffa pa mor lwcus ydyn ni i gael hyn i gyd yng Nghymru.

Y noson orau i mi gael hyd yma yw Gwobrau BAFTA Cymru 2026. Roedd yn deimlad rhyfedd bod yno, wedi fy amgylchynu gan gymaint o bobl talentog a finnau'n ffan mawr o'u gwaith nhw.

Roeddwn i'n teimlo mor lwcus i fod yn rhan ohono, ac roedd cael cyflwyno gwobr yn ei wneud yn hyd yn oed fwy arbennig. Mae o'n sicr yn noson fyddai'n ei gofio am amser hir.

Bybli, meddylgar, penderfynol.

Mae meddwl am y foment ges i wybod fy mod wedi cael fy newis fel prif gymeriad yn y ffilm Out There, wedi ei gyfarwyddo gan Simon Ryninks, yn atgof wneith wastad gwneud i mi wenu. Dwi'n cofio teimlo'n gyffrous ond hefyd methu credu bo fi am wneud rhywbeth rydw i wedi breuddwydio am wneud ers mor hir. Roedd gwybod fod rhywun yn ymddiried ynddof i ar gyfer y rôl yn golygu lot, yn enwedig a finnau'n actor gymharol newydd. Mae meddwl am y foment yna, cyn oeddwn i'n gwybod be fuasa'r holl brofiad yn ei olygu, yn dal yn fy ngweud i'n hapus. Tydw i dal methu coelio ges i weithio gyda mawrion y byd actio yng Nghymru fel Michael Sheen, Aneurin Barnard, Remy Beasley ac Iwan Rheon. Roedd bod yn rhan o gast o bobl rydw i'n eu hedmygu ers mor hir yn gwneud y profiad yn un arbennig iawn.

Yr adeg a gododd y fwyaf gywilydd arnai oedd, ychydig flynydoedd yn ôl tra'n perfformio'r gân Naughty o Matilda mewn sioe, pan ddisgynais oddi ar y llwyfan yn ystod y gân! Dwi dal i gofio'r teimlad na yn fy mol pan sylwais i beth oedd yn digwydd, ac yr embaras ar ôl hynny. Mae'n ddoniol i edrych yn ôl ar y peth nawr, ond ar y pryd dwi'n cofio dymuno swni'n gallu diflannu.

Y tro diwethaf i mi grio oedd wrth wylio'r sylwebaeth newyddion o gwmpas y digwyddiadau oedd yn nodi 60 mlynedd ers trychineb Aberfan. Roedd meddwl am y plant 'na aeth i'r ysgol a'r teuluoedd na chafodd eu gweld yn dod adref yn torri fy nghalon. Mi ddigwyddodd mor agos i ble dyfais i fyny, sy'n ei wneud yn fwy personol rhywsut. Wrth glywed pobl yn siarad amdano yr holl flynyddoedd wedyn, rydych yn gallu teimlo sut mae'r peth yn dal yn eu heffeithio.

Un arfer drwg sydd gen i ydi bo fi methu cadw fy nwylo yn llonydd. Dwi'n aml yn ffeindio fy hun yn gwingo heb hyd yn oed sylwi, ac yna dwi'n pigo fy ngwinedd pan dwi'n teimlo'n bryderus neu'n ceisio canolbwyntio. Dwi'n ymwybodol iawn o'r peth ac yn gweithio'n galed ar wella'r peth.

Fy hoff ffilm yw 10 Things I Hate About You. Dwi'n caru'r cymeriadau a'r cemeg rhyngddyn nhw, a'r ffaith fod o'n un o'r ffilmiau rheiny mae rhywun yn gallu ei wylio drosodd a drosodd heb ddiflasu arno. Hefyd, mae 'na rhywbeth am y 2000au cynnar dwi'n ei garu. Mae'n ffilm sy'n rhoi fi mewn hwyliau da yn ddi-ffael.

Taswn i'n gallu cael diod gyda rhywun, byw neu farw, faswn i'n dewis fy Mam-gu. Mae 'na gymaint o fomentau a cherrig milltir cyffrous wedi bod yn fy mywyd, yn enwedig yn fy ngyrfa, nad ydy hi wedi bod yma i weld. Baswn i'n caru cael y cyfle i eistedd lawr gyda hi a rhannu a thrafod popeth dwi wedi bod yn ddigon ffodus i gyflawni. Dwi'n meddwl y buasa hi'n eithriadol o browd o pa mor bell dwi wedi dod, a mwy na dim swni jysd yn caru cael yr asmer 'na gyda hi a'i gwneud yn rhan o'r holl beth.

Rhwybeth amdana i nad oes llawer o bobl yn ei wybod ydi roeddwn i'n Kickboxing Grand Champion pan o'n i'n chwe mlwydd oed i'r WCKA.

Dwi'n meddwl baswn i'n gwneud skydiving. Mae'n rywbeth dwi wedi wastad wedi bod yn ofn gwneud, ond yn gyfrinachol wastad wedi bod eisiau rhoi go arni. 'Swn i mwy 'na thebyg yn treulio'r holl siwrna fyny i'r awyr yn cwestiynu fy mhenderfyniad, ond swni'n caru gwybod beth mae'r teimlad 'na o neidio fel. Tasa fo'n fy niwrnod olaf ar y blaned dwi'n meddwl swn i'n ffeindio'r dewrder i fynd amdani. Wedyn 'swn i'n treulio gweddill y dydd gyda'r pobl dwi'n eu caru yn dweud wrthyn nhw am y profiad.

Un llun sy'n bwysig iawn i mi ydi llun o fy ffrindiau a fi ar ein diwrnod cyntaf ar set Out There. Mae'n golygu llawer i mi achos ges i rannu'r foment arwyddocaol 'ma o fy ngyrfa gyda phobl sy'n golygu gymaint i mi. Roedd hi'n arbennig gallu rhoi'r profiad i fy ffrindiau o fod ar set ffilm. Os 'dych chi'n dod o'r cymoedd, dwi'n teimlo weithiau bo' 'na ddiffyg cyfleon ac agoriad i'r diwydiant ffilm a theledu, felly roedd gallu agor rhywfaint ar y drws 'na yn golygu lot i mi. Mae'n lun sy'n cynrychioli carreg filltir pwysig i mi yn bersonol, ond hefyd pwysigrwydd rhannu cyfleon a dod â phobol ar y siwrna efo chi.

Byddwn i mwy na thebyg yn dewis bod yn Mckenna Grace am ddiwrnod. Rydw i wastad wedi edmygu sut lwyddodd hi i ffufrio gyrfa mor trawiadol o oedran mor ifanc. 'Swn i'n caru profi sut ma diwrnod yn ei bywyd hi'n teimlo, o weithio ar y set gyda gwahanol cyfarwyddwyr ac actorion, a'r holl brofoiadau a chyfleon sy'n dod gyda'r gyrfa hwnnw. Mi fasa fo'n hynod ddiddorol gallu camu i mewn i'w esgidiau hi a chael golwg ar y diwydiant o'i pherspectif hi.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.