ఇజ్రాయెల్‌లో మళ్లీ ఎన్నికలు జరుగుతాయా, ఆ దేశ మీడియా ఏం చెబుతోంది?
ఫొటో సోర్స్, Getty Images
ఇజ్రాయెల్‌లో బెంజమిన్ నెతన్యాహు నేతృత్వంలోని కూటమికి పార్లమెంటులో మెజార్టీ రాకపోవడంతో కొత్త ప్రభుత్వం ఏర్పాటుపై ప్రతిష్ఠంభన కొనసాగుతోంది.
ఇజ్రాయెల్ పార్లమెంటులో నవంబర్ 10నప్రమాణ స్వీకార కార్యక్రమం జరిగింది. కానీ, కొత్త ప్రభుత్వ ఏర్పాటుపై చర్చలు ఇంకా కొనసాగుతున్నాయి.
సార్వత్రిక ఎన్నికల్లో ప్రధాని బెంజమిన్ నెతన్యాహుతోపాటు ఆయన ప్రధాన ప్రత్యర్థులకు కూడా పార్లమెంటులో అధికారం దక్కేంత మెజార్టీ రాలేదు.
అక్టోబర్ 27న జరిగిన ఎన్నికల్లో గెలిచిన ఎంపీలు ప్రమాణ స్వీకారం చేశారు.
మరోపక్క ప్రభుత్వ ఏర్పాటుకు అవసరమైన కూటమిని సిద్ధం చేయడానికి మాజీ జనరల్ ఐజెన్‌కోట్ ప్రయత్నిస్తున్నారు.
ప్రభుత్వాన్ని ఏర్పాటు చేయాల్సిందిగా ఐజెన్‌కోట్‌కు ఇజ్రాయెల్ అధ్యక్షుడు ఆహ్వానం పలికారు.
కానీ, ఐజెన్‌కోట్‌కు, ఆయన మిత్రపక్షాలకు కూడా పార్లమెంటులో మెజార్టీ లేదు. ప్రభుత్వ ఏర్పాటుకు అవసరమైన మద్దతు ఇవ్వగల పార్టీలతో ఇప్పటివరకు వాళ్లు ఎలాంటి ఒప్పందానికి రాలేకపోయారు.
ఐజెన్‌కోట్, నెతన్యాహు ఇద్దరూ కూటమి ప్రభుత్వాన్ని ఏర్పాటు చేయడంలో విఫలమైతే ఇజ్రాయెల్‌లో మళ్లీ ఎన్నికలు జరిగే అవకాశం ఉంది.
ఫొటో సోర్స్, Getty Images
‘ఎంపీల ప్రమాణస్వీకారంతో ఎన్నికల కౌంట్‌డౌన్’
ప్రభుత్వ ఏర్పాటుకు ఉన్న అవకాశాలపై ఇజ్రాయెల్ మీడియాలో చర్చలు జోరందుకున్నాయి.
కొత్త పార్లమెంటు (క్నెసెట్)లో ఎంపీల ప్రమాణ స్వీకారానికి ముందు, దాని భవిష్యత్తు ఎలా ఉండబోతోందనే అంశంపై ఇజ్రాయెల్ మీడియా చర్చించింది.
పార్లమెంటుపై ఎవరి నియంత్రణ ఉంటుంది? ఎవరు ప్రధానమంత్రి అవుతారు? అనే విషయాలపై అనిశ్చితి కొనసాగుతున్న సమయంలోనే క్నెసెట్ సభ్యులు ప్రమాణ స్వీకారం చేశారు.
ఐజెన్‌కోట్ ఎదుర్కొంటున్న సవాళ్లను కూడా ఇజ్రాయెల్ మీడియా ప్రస్తావించింది.
ఇజ్రాయెల్‌లో మళ్లీ ఎన్నికలు జరిగే అవకాశం ఉందని ఆర్థిక అంశాలకు సంబంధించిన వెబ్‌సైట్ 'ది మార్కర్' పేర్కొంది.
"ఈ రోజు క్నెసెట్‌లో జరిగే ప్రమాణ స్వీకారంతో మళ్లీ ఎన్నికలు జరగడానికి కౌంట్‌డౌన్ ప్రారంభమవుతుంది" అని ఆ వెబ్‌సైట్ రాసింది.
రాజకీయ పార్టీలు "కఠినమైన రాజీలకు" అంగీకరించకపోతే మళ్లీ ఎన్నికలు జరిగే అవకాశం ఉందని సెంట్రిస్ట్ టీవీ ఛానల్ 13 పేర్కొంది.
మళ్లీ ఎన్నికలు జరిగితే "ప్రజల జేబులపై మరింత భారం, సమాజంలో ఎక్కువ విభజన, అస్థిరత" ఏర్పడతాయని ఆ ఛానల్ వ్యాఖ్యానించింది.
నెతన్యాహు వ్యతిరేక కూటమిలోనే విభేదాలు ఉన్నాయని, అవి ఆ కూటమిని బలహీనపరిచే అవకాశం ఉందని 'ది మార్కర్'లోని ఒక కాలమిస్ట్ పేర్కొన్నారు.
మాజీ ప్రధానమంత్రి నఫ్తాలి బెన్నెట్, వామపక్ష డెమొక్రాట్లు ఒకవైపు ఉన్నారు. మరోవైపు మితవాద వైఖరి కలిగి మతపరమైన భాగస్వాములతో కలిసి పనిచేసే అవకాశం ఉన్న అవిగ్డోర్ లీబర్‌మన్ ఉన్నారు.
మితవాద నేత లీబర్‌మన్ ఎన్నికల తర్వాత నుంచి అత్యంత సంప్రదాయవాద పార్టీలను తనవైపు తిప్పుకోడానికి ప్రయత్నిస్తున్నారు. పాలస్తీనా ప్రజల ప్రాతినిధ్యం ఎక్కువగా ఉన్న పార్టీలతో కలిసి పనిచేయకుండా అడ్డుకోవడం ఈ ప్రయత్నం వెనుక ఉన్న ఒక ఉద్దేశం.
అయితే అతి సంప్రదాయవాద మీడియా సంస్థలు మాత్రం తమ కూటమి ఏ రాజకీయ పక్షంలోనూ భాగం కాదని స్పష్టం చేశాయి.
యునైటెడ్ తోరా జుడాయిజం పార్టీకి చెందిన ఒక వర్గానికి అనుబంధంగా ఉన్న 'యాటెడ్ నీమన్' అనే వార్తాపత్రిక "మేం వామపక్షం కాదు, మితవాదం కూడా కాదు" అని పేర్కొంది.
పార్టీ నాయకులు వర్గ రాజకీయాలకు దూరంగా ఉండాలని కూడా ఆ పత్రిక హెచ్చరించింది.
ఫొటో సోర్స్, Getty Images
పార్లమెంట్‌పై నియంత్రణకు ప్రయత్నం
నెతన్యాహు వ్యతిరేక కూటమిలో ప్రభుత్వం ఏర్పాటు చేయాలనే తొందర కనిపిస్తోందని వామపక్ష భావజాలం ఉన్న 'హారెట్జ్' వార్తాపత్రిక పేర్కొంది.
"దాదాపు అసాధ్యమైన పరిస్థితుల్లో ప్రభుత్వాన్ని ఏర్పాటు చేయడం ఐజెన్‌కోట్ ముందున్న సవాలు" అని ఆ పత్రిక వ్యాఖ్యానించింది.
మధ్యేవాద వెబ్‌సైట్ వై నెట్ కథనం మేరకు, కొత్త క్నెసెట్‌లో ఐజెన్‌కాట్‌కు చెందిన యాషర్ పార్టీ నాయకత్వంలో వేగంగా చట్టాల రూపకల్పనకు సన్నాహాలు జరుగుతున్నాయని పేర్కొంది.
క్నెసెట్ స్పీకర్ పదవిని తన వద్దే ఉంచుకోవాలని ఐజెన్‌కోట్‌కు చెందిన యాషర్ పార్టీ భావిస్తోందని సెంట్రిస్ట్ వెబ్‌సైట్ 'వై నెట్' తెలిపింది. ఇతర పార్లమెంటరీ కమిటీల పదవులను ఐజెన్‌కోట్ మద్దతుదారులకు కేటాయించే అవకాశం ఉందని వై నెట్ తెలిపింది.
మత సేవల శాఖ మాజీ మంత్రి మతాన్ కహానాను ఈ స్పీకర్ పదవి స్వీకరించే అవకాశం ఉన్న అభ్యర్థిగా మీడియా కథనాలు పేర్కొన్నాయి.
నెతన్యాహుకు మద్దతు ఇచ్చే ఛానల్ 14 రాజకీయ సంపాదకుడు ఒకరు క్నెసెట్‌పై ఐజెన్‌కోట్ నియంత్రణ సాధించాలనుకోవడం ఆయన "దశలవారీ వ్యూహంలో" భాగమని వ్యాఖ్యానించారు.
ముందుగా నెతన్యాహు వ్యతిరేక కూటమిలో, ఆ తర్వాత సాధారణ ప్రజల్లో తన నాయకత్వాన్ని బలోపేతం చేసుకోవడం ఈ వ్యూహం వెనుక ఉద్దేశమని పేర్కొన్నారు.
ప్రభుత్వం అధికారికంగా ఏర్పడకముందే ఆ కూటమి తీసుకోగల కీలకమైన తొలి అడుగులుగా భావిస్తున్నారు.
120 మంది సభ్యులున్న క్నెసెట్‌లో 19 స్థానాలు కలిగిన, అధికశాతం పాలస్తీనియన్ల ప్రాతినిధ్యం ఉన్న పార్టీల మద్దతుతో ఈ చర్యలు సాధ్యమయ్యే అవకాశం ఉంది.
అయితే పాలస్తీనా ప్రజల ప్రాతినిధ్యం ఎక్కువగా ఉన్న పార్టీలు ఐజెన్‌కోట్ నేతృత్వంలోని కూటమిలో చేరే అవకాశం "ప్రస్తుతానికి లేదని" వై నెట్ స్పష్టం చేసింది.
స్పీకర్, పార్లమెంటరీ కమిటీల నియామకానికి పాలస్తీనా పార్టీల ఓట్లపై ఆధారపడటాన్ని "ఉగ్రవాద శక్తులతో కలిసి పనిచేయడమే" అని ఛానల్ 14 పేర్కొంది.
అయితే 'అరబ్ పార్టీలు లేదా అరబ్ ప్రజలను దూరం పెట్టవద్దు' అని డెమొక్రాట్స్ పార్టీ నాయకుడు యైర్ గోలన్, ప్రభుత్వ ప్రసార సంస్థ 'కాన్'లో ప్రసారమైన ఒక ప్రసంగంలో నెతన్యాహు వ్యతిరేక కూటమిలోని తన సహచరులకు విజ్ఞప్తి చేశారు.
క్నెసెట్ స్పీకర్‌ను మార్చడం అనేది వేగంగా జరగబోయే రాజకీయమార్పులకు "కేవలం ఆరంభం" మాత్రమేనని సెంట్రిస్ట్ వార్తాపత్రిక 'మారివ్' పేర్కొంది.
అక్టోబర్ 7 దాడులపై జాతీయ స్థాయి విచారణ జరిపించడం, సుప్రీంకోర్టు అధికారాలను పరిమితం చేసే చట్టాలను రద్దు చేయడం వంటి ప్రణాళికలను కూడా ఆ పత్రిక ప్రస్తావించింది.
(బీబీసీ కోసం కలెక్టివ్ న్యూస్‌రూమ్ ప్రచురణ)
(బీబీసీ తెలుగును వాట్సాప్, ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)
