Ar daith i Moldofa

Mae tîm pêl-droed Cymru yn Chisinau i herio Moldofa ar 5 Medi yn eu hymgais i gyrraedd rowndiau terfynol Cwpan y Byd yn Rwsia yr haf nesaf.

Ond faint wyddoch chi am y wlad yn Nwyrain Ewrop? Dyma ychydig o ffeithiau diddorol gan Cymru Fyw:

Twristiaid yn brin

Moldofa yw'r wlad sy'n cael y nifer lleiaf o ymwelwyr yn Ewrop o'i gymharu â maint ei phoblogaeth gyfan.

Dim ond 121,000 o bobl wnaeth ymweld â Moldofa yn 2016, yn ôl y Cenhedloedd Unedig.

Yr unig wledydd sy'n cael llai o ymwelwyr ydy Bangladesh a Guinea.

Seler win fwya'r byd

Yn Moldofa mae'r casgliad mwyaf o win yn y byd. Yn seler win Mileștii Mici mae casgliad o 2,000,000 o boteli, gyda thua 70% ohonynt yn win coch.

Mae gwin wedi ei gynhyrchu yn y wlad ers bron i 5,000 o flynyddoedd, ac mae'r diwydiant gwin yn gryf yno hyd heddiw.

Buwch ar y faner

Bual (bison) mawr i fod yn fanwl gywir. Maen nhw wedi diflannu bellach, ond fe'i gwelwch nhw ar faner genedlaethol Moldofa, sydd â llun pen bual mawr ar darian.

Cafodd Stadiwm Zimbru (y stadiwm genedlaethol lle mae Moldofa yn chwarae eu gemau pêl-droed gartref) ei enw o'r gair Rwmanaidd am fual.

Tynnwch eich 'sgidiau!

Mae'n cael ei ystyried yn ddigywilydd i ymweld â chartref yn Moldofa heb dynnu eich esgidiau. Gadewch nhw wrth y drws ffrynt!

Fel yn nifer eraill o wledydd y rhanbarth, glendid sydd y tu ôl i'r arferiad. Yn aml mae pâr o slipers ar gael ar gyfer ymwelwyr.

Cafodd y brifddinas Chisinau ei chipio gan fyddin Rwsia ym Mehefin 1940 ac yn ddiweddarach y flwyddyn honno roedd 'na ddaeagryn yno yn mesur 7.3 ar y raddfa Richter.

Roedd yna ragor o ddinistr pan geisiodd byddin Rwmania adennill y ddinas yn 1941. Roedd yna ymosodiadau o'r awyr hefyd gan awyrennau'r Luftwaffe.

Yn ôl Sefydliad Iechyd y Byd (WHO), mae 'na fwy o bobl yn Moldofa yn yfed alcohol nac yn unrhyw le arall yn y byd, wel ar wahân i Belarus! Gobeithio 'na fydd ganddyn nhw achos dathlu nos Fawrth!

Mae codi pwysau yn gamp fawr ym Moldofa, gyda enwau fel Oleg Sîrghi, Cristina Iovu a Andrei Perpeliţă yn enwau cyfarwydd yn y wlad.

Pêl-droed yw'r gamp fwyaf poblogaidd yn y wlad, er eu bod eto i gyrraedd Pencampwriaethau Ewrop neu Gwpan y Byd ers dechrau cystadlu fel gwlad yn 1994 (cyn hynny roedden nhw'n cystadlu fel rhan o'r Undeb Sofietaidd).

Ymysg enwogion eraill mae Ion Cuțelaba sy'n ymladd yn yr UFC a Dmitri Arhip, prop Y Gweilch.

Yn 2005, mewn ymgais i gael mynediad i'r Môr Du fe wnaeth Moldofa gyfnewid rhywfaint o dir gyda Iwcrain, ac yn y broses mi wnaethon nhw hawlio 600m o lannau'r Danaw (Danube) sy'n llifo i'r Môr Du.