Prif weithredwr Betsi Cadwaladr yn gadael am swydd newydd yn Lloegr

Mae prif weithredwr Bwrdd Iechyd Prifysgol Betsi Cadwaladr, Carol Shillabeer, yn gadael ei swydd ar ôl cael ei phenodi'n brif weithredwr sefydliad iechyd yng ngogledd-orllewin Lloegr.

Bydd yn ymuno ag Ymddiriedolaeth GIG Sir Gaerhirfryn a De Cumbria ar ddechrau'r flwyddyn newydd, ar ôl treulio tair blynedd a hanner yn arwain y bwrdd iechyd yng ngogledd Cymru.

Dywedodd arweinydd y Ceidwadwyr yng Nghymru, Darren Millar AS, nad oedd Ms Shillabeer wedi llwyddo i fynd i'r afael â methiannau'r GIG yn y rhanbarth na gwella perfformiad.

Ymunodd Ms Shillabeer â Bwrdd Iechyd Prifysgol Betsi Cadwaladr fel prif weithredwr dros dro ym mis Mai 2023, yn fuan ar ôl i'r sefydliad gael ei roi mewn mesurau arbennig.

Dywedodd y bwrdd iechyd ei bod wedi arwain y sefydliad drwy gyfnod o "sefydlogi a gwelliant", gan weithio gyda'r bwrdd, y tîm gweithredol a staff i ganolbwyntio ar wella gwasanaethau i bobl gogledd Cymru.

Dywedodd cadeirydd y bwrdd iechyd, Dyfed Edwards, ei fod yn llongyfarch Ms Shillabeer ar ei phenodiad newydd.

"Ymunodd Carol â Betsi Cadwaladr ar adeg eithriadol o heriol yn hanes y sefydliad ac mae wedi darparu arweinyddiaeth ymroddedig a phenderfynol dros y tair blynedd a hanner diwethaf," meddai.

Ychwanegodd fod "cryn dipyn o waith yn parhau i'w wneud" a bod y "daith tuag at wella yn parhau."

Dywedodd y byddai'r bwrdd nawr yn "ystyried y trefniadau arweinyddiaeth priodol" ac yn rhoi gwybod am y penderfyniadau hynny ar ôl cwblhau'r prosesau angenrheidiol.

Dywedodd Ms Shillabeer ei bod yn "fraint enfawr" cael gwasanaethu fel prif weithredwr y bwrdd iechyd, a'i bod yn "falch o'r hyn roedd cydweithwyr ar draws y sefydliad wedi'i gyflawni yn ystod cyfnod heriol iawn".

Dywedodd ei bod wedi gweld "ymroddiad staff i gleifion, teuluoedd a chymunedau gogledd Cymru" drosti ei hun.

Ychwanegodd fod y cyfle i ddod yn brif weithredwr Ymddiriedolaeth GIG Lancashire a De Cumbria yn "gam cyffrous nesaf" yn ei gyrfa, ond na fyddai'n hawdd gadael Betsi Cadwaladr a'r bobl roedd wedi gweithio gyda nhw.

Dywedodd arweinydd y Ceidwadwyr yng Nghymru, Darren Millar, fod angen "prif weithredwr cymwys" ar y bwrdd iechyd a oedd yn gallu "mynd i'r afael â methiannau'r GIG yng ngogledd Cymru a gwella perfformiad gwael".

"Yn anffodus, nid oedd Carol Shillabeer yn gallu gwneud y gwaith hwnnw," meddai.

Ychwanegodd ei fod yn "dymuno'r gorau iddi ar gyfer y dyfodol" ac yn edrych ymlaen at ymgysylltu'n gadarnhaol â'i holynydd er mwyn sicrhau gwasanaethau iechyd gwell i bobl y rhanbarth.

Bydd Ms Shillabeer yn parhau yn ei swydd fel prif weithredwr Betsi Cadwaladr tan iddi ymuno â'i sefydliad newydd, a bydd y bwrdd iechyd yn cyhoeddi trefniadau arweinyddiaeth dros dro a thymor hwy maes o law.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.