Dilyniant i Pen Dafad gan Bethan Gwanas 21 mlynedd yn ddiweddarach - diolch i blant Bethel

Mae un o hoff awduron plant a phobl ifanc Cymru, Bethan Gwanas, wedi cyhoeddi dilyniant i'w nofel boblogaidd Pen Dafad, a hynny 21 mlynedd yn ddiweddarach.

Ers 2005, mae cenedlaethau o blant a phobl ifanc wedi darllen anturiaethau Dewi, y bachgen sy'n trawsnewid i fod yn ddafad bob nos.

Ac fe wnaeth darllen y nofel fer, fywiog honno ennyn chwilfredydd dosbarth Blwyddyn 6 Ysgol Gynradd Bethel (ger Caernarfon), a oedd yn llawn cwestiynau am gymeriad Menna, sydd hefyd yn troi'n banther yn Pen Dafad.

Eglurodd Bethan: "Mae 'na 21 mlynedd rhwng y ddwy gyfrol - ydi hynna'n record am ddilyniant tybed?

"Yn OMB – Dwi'n Banther! mae Menna, sydd bellach yn 16 oed, yn sylwi ei bod yn fwy blewog ac yn dechrau tyfu pedwar dant hir, miniog.

"Fyddai'r llyfr hwn ddim yn bod oni bai am Dylan Parri, oedd yn ddirprwy Ysgol Gynradd Bethel yn 2024.

"Roedd Blwyddyn 6 yr ysgol yn fythgofiadwy - roedden nhw newydd ddarllen Pen Dafad ac yn llawn bwrlwm a chwestiynau, ac yn crefu arna i i sgwennu dilyniant. 'Allech chi sgwennu o safbwynt Menna,' medden nhw, 'yr hogan sy'n troi'n banther - pan mae'r ddau 'chydig hŷn, oed TGAU neu rywbeth, ac yn troi'n anifeiliaid eto.'"

Fe apeliodd y syniad at Bethan yn syth, ac mae hi hefyd yn ddiolchgar i griw o Ysgol Godre'r Berwyn a fuodd yn ei helpu wrth ddatblygu ei phlot.

Ond sut mae awdur yn datblygu nofel?

Mae Cymru Fyw wedi gofyn i Bethan ddewis tri llun sy'n ein tywys ar ei thaith wrth ysgrifennu ei dilyniant newydd.

Criw Blwyddyn 6 Ysgol Gynradd Bethel ofynnodd i mi 'sgwennu dilyniant 'nôl yn 2024 ond does gen i ddim llun o'r diwrnod hwnnw, felly dyma lun ohona i efo plant Porthmadog yn lle.

Mae sgwrsio efo plant wastad yn fy ysbrydoli a dwi isio sgwennu llyfrau i'w plesio nhw er mwyn cael mwy o blant a phobl ifanc Cymru i fwynhau darllen.

Ond doedd cael y stori i weithio ddim yn hawdd a dyna fy esgus i dros gymryd dwy flynedd i sgwennu'r llyfr ar ôl cysylltu efo'r Lolfa i holi fyddai gynnyn nhw ddiddordeb mewn cyhoeddi dilyniant.

Dwi'n meddwl bod y criw ym Mlwyddyn 9 erbyn hyn, ddim yn rhy hwyr iddyn nhw ei fwynhau o, gobeithio.

Mae 'na 21 mlynedd ers i Pen Dafad ymddangos gynta' felly mae'n bosib y bydd 'na rieni'n mwynhau darllen OMB hefyd!

Mae'n rhaid 'mod i'n mwynhau'r busnes troi'n anifeiliaid achos dyna sy'n digwydd yn Llwyth hefyd.

Mae Bleddyn yn gallu troi'n flaidd, Branwen yn amlwg yn troi'n frân a dim gwobrau am ddyfalu be' ydi hanes Arthur... a Drogen - hogan fach eiddil sy'n cael ei bwlio sy'n gallu troi'n ddraig.

Do, mi wnes i 'fenthyg' y syniad o lyfrau George RR Martin, A Song of Ice and Fire drodd wedyn yn gyfres deledu Game of Thrones.

Ond roedd o'n gweithio'n berffaith yn Gymraeg doedd?

Roedd George wedi 'benthyg' cryn dipyn o'r hen chwedlau Cymraeg beth bynnag.

Er mwyn gallu canolbwyntio a disgrifio Menna Morgan yn troi'n banther, y llun hwn oedd fy screensaver am fisoedd.

Maen nhw'n anifeiliaid mor hardd a rhyfeddol o gyhyrog, a sbïwch ar y llygaid yna... dychmygwch weld rheina'n rhythu arnoch chi yn y drych.

Neu o'r tywyllwch a chithau'n ddafad… achos ydi, mae Dewi druan yn dechrau troi'n ddafad eto hefyd.

Er gwaetha'r chwysu dros y plot, ges i andros o hwyl yn sgwennu OMB.

A dwi wedi dotio at y clawr. Mae 'na gylch eitha taclus yn fan'no hefyd gan fod yr arlunydd, Sïan Angharad, yn cofio fi'n mynd i'w hysgol gynradd hi ym Moelfre i sôn am lyfrau.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.