Teulu'n dathlu 50 mlynedd o werthu sglodion yng Nghricieth

Am dros 50 mlynedd mae siop sglodion y Castell wedi bod yn rhan allweddol o dref Cricieth.

Mae'r siop hefyd wedi bod yn rhan o'r un teulu ers agor ei ddrysau yn 1976.

Perchnogion presennol y siop yw Nick Garbutt a'i bartner Kate.

Rhieni Kate brynodd y siop yn 1976, mae Kate a Nick wedi bod yn bartneriaid ers 38 mlynedd ac bellach yn rhedeg y siop.

Dywedodd Nick ar raglen Bore Cothi ar Radio Cymru: "Cychwynais weithio yna tua 24 mlynedd nôl.

"Yn 1976 'nath Mam a Nhad yng nghyfraith gymryd drosodd, yn ystod yr haf poethaf ar record," meddai.

Doedd gan Nick ddim profiad o weithio mewn siop sglodion pan ddechreuodd weithio yno, ond penderfynodd fynd ar gwrs i ddinas Leeds ac ymrwymo i fusnes y teulu a gadael ei waith.

"Weldar o'n i ac roedd Kate yn gweithio i Gyngor sir Conwy ar y pryd.

"Roedd y siop ar werth a cyn i ni feddwl amdano 'naethon ni 'neud i ffwrdd â'r gwaith a chymryd y siop. Fe aethon ni ar gwrs i Leeds i ddechrau off," meddai.

Roedd cymaint i'w ddysgu mewn cyn lleied o amser, ond buan iawn daeth Nick a Kate i ddeall beth oedd ei angen o ran cymryd y busnes drosodd.

"Yn Leeds, roeddech chi'n dysgu sut i neud y batter a sut i baratoi'r olew a'i gadw fo'n lân a sut i neud y chips.

"Yr unig beth oedden ni'n gwybod oedd beth oedd tad Kate wedi ein dysgu ni i 'neud, ond roedden ni eisiau gwybod ein hunain sut i redeg y siop," meddai.

Wrth edrych yn ôl dros y degawdau mae llawer o bethau wedi newid.

Mae Nick yn cofio'r cyfnod pan oedd bag o sglodion yn llai na £1, ond maen nhw wastad wedi sicrhau eu bod nhw'n prynu'r cynhwysion gorau.

"Mae 'na lot o bethau wedi newid.

"Pan naethon ni gymryd drosodd roedd chips yn 95c a fish yn £1.95.

"Mae pris pysgodyn rŵan yn £8.90 a jest dros £3 am fag o chips," meddai.

Mae rhedeg busnes mewn tref glan môr yn golygu oriau hir a llawer o amser allan o'r tŷ ar nosweithiau braf o haf.

O ganlyniad i weithio'n galed dros y blynyddoedd, mae Nick a Kate bellach yn cau'r siop dros y gaeaf er mwyn gallu mwynhau amser gyda'r teulu.

"Rydan ni wedi rhoi lot o gariad i'r busnas a phrynu'r stwff gorau i mewn.

"Rydan ni newydd orffen a chau ddydd Gwener ac rydan ni yn cau dros y gaeaf tan ryw ddau ddiwrnod cyn y Pasg.

"Dros y gaeaf rydan ni'n cael lot o amser teulu, rydan ni wedi colli allan efo'r plant yn tyfu ond rydan ni'n 'neud fyny amdano dros y gaeaf," meddai.

Wrth i'r teulu gymryd seibiant o'r siop bydd cyfle i edrych nôl dros hanner canrif o wasanaethu cwsmeriaid llwglyd Cricieth cyn i'r cyfan ddechrau eto yr haf nesaf.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.