Cwpl cyntaf Priodas Pum Mil: 'Pawb ym Methesda tu ôl i ni'

10 mlynedd yn ôl priododd Iolo a Nia Roberts o Fethesda gyda chamerau teledu yn recordio'r cyfan.

Nhw oedd y cwpl cyntaf i ymddangos ar gyfres Priodas Pum Mil ar S4C gan ildio trefniadau'r diwrnod mawr i'w teulu a ffrindiau ym Methesda.

Bu Nia'n rhannu ei hatgofion o'r briodas yn 2016 gyda Cymru Fyw ac yn edrych yn ôl ar 10 mlynedd o fywyd priodasol.

Meddai: "Mae o'n neis sbïo 'nôl ar y diwrnod. Mae gymaint sy' wedi digwydd yn y ddeng mlynedd.

"'Dan ni 'di colli ambell i aelod teulu rili agos ers hynny so mae'n neis cael gweld nhw eto ar y rhaglen.

"Mae Iolo wedi colli ei dad, Taid Trefor, yn ddiweddar.

"Ac mae'n neis gallu sbïo nôl a gweld o yn y priodas. Mae hynna'n neis i gadw.

"Mae gymaint sy 'di digwydd. 'Dan ni 'di symud tŷ, dwi 'di mynd i ddysgu ysgol meithrin fel uwch gymhorthydd ac mae'r plant i gyd yn yr ysgol uwchradd rŵan.

"Mae bywyd wedi bod yn brysur."

Yn y 10 mlynedd ers i'r gyfres gychwyn ar 13 Tachwedd 2016 mae 65 o gyplau wedi priodi gyda help y cyflwynwyr Emma Walford a Trystan Ellis-Morris sy'n trefnu'r holl ddiwrnod am £5,000.

Ac mae'r cynhyrchwyr yn dyfalu fod y gyfres wedi helpu cyplau Cymru i arbed dros £1m gan fod priodas yn costio rhyw £20,000 ar gyfartaledd.

Meddai Nia: "Mae bob tro'n neis cael y rhaglen fatha reminder o lle 'dan ni 'di dod. Mewn fflat wedi rhentu oeddan ni'n byw ar y pryd ac yn lwcus i gael y priodas pum mil achos dwi'm yn meddwl 'swn ni 'di gallu neud o fel arall efo pres a fel oeddan ni'n safio i adeiladu tŷ ein hunain a gyda thri o blant bach i gyd o dan chwech.

"Sa fo ddim 'di bod yn bosib heb y priodas pum mil, 'dan ni'n hynod ddiolchgar hyd heddiw achos 'dan ni 'di priodi ac i gyd efo'r un cyfenw ac o'dd o'n lyfli o ddiwrnod.

"Mae pawb yn chwerthin â atgofion melys, hapus iawn yn cofio'r diwrnod lle aeth bob dim i plan."

Gyda ffrindiau a theulu Nia a Iolo yn trefnu pob manylyn o'r briodas mae Nia'n dal i deimlo'n ddiolchgar iddynt ac i gymuned Bethesda lle cafodd hi ei magu a lle mae'r ddau'n byw hyd heddiw: "Oeddan ni'n lwcus ofnadwy o ran teulu agos - brodyr, chwiorydd, pawb isio'r gorau i ni.

"A'r gymuned hefyd - oedd pawb ym Methesda tu ôl i ni. Doeddet ti ddim yn sylweddoli tan hynny be' mae pobl yn feddwl ohono chdi i ddweud y gwir ond oedd pawb 'di dod at ei gilydd.

"Mae'r teimlad cymunedol yna'n Bethesda a 'sa Iolo a fi ddim yn symud o 'ma rŵan. Mae'n gymuned lyfli."

Ac mae'r gymuned wedi cefnogi'r ddau yn ystod y 10 mlynedd o briodas hefyd, yn ôl Nia: "'Dan ni 'di gwarchod plant ein gilydd a dathlu pethau pwysig. 'Dan ni 'di crio a chwerthin efo'n gilydd, so 'dan ni rili yn agos fatha teulu a ffrindiau.

"Pentre fel 'na ydy o, mae pawb rhywsut yn ffrindiau i'w gilydd."

Fel y cwpl cyntaf i roi'r awenau i'w ffrindiau a'u teulu ar gyfer Priodas Pum Mil, roedd angen bod yn reit ddewr, meddai Nia: "Roeddan ni efo rhyw feddylfryd am sut fath o ddiwrnod oeddan ni eisiau, ond wrth roi o yn nwylo rhywun arall doeddan ni ddim yn gwybod be' roeddan ni'n mynd i gael.

"Roedd o'n emosiynol. Dwi'n cofio cerdded i fewn ac roedd yna lot i gymryd i fewn. Roedd Emma a Trystan yn jyst dangos be oedd ffrindiau a theulu wedi neud.

"Oedd bob dim efo rhyw touch bach personol hyd yn oed lawr i'r caneuon. Mae pawb yn 'nabod fi a Iolo a 'dan ni wedi licio teithio erioed. So, roedd un o'r ffrindiau 'di printio llwyth o fapiau a thorri siâp calon a 'di pin-pointio'r gwledydd roedden ni 'di bod iddynt.

"Dwi'n cofio'r calonnau 'ma rownd y tent i gyd, oedd hwnna 'di cymryd oriau. Naeth fy Mam a chwaer a ffrindiau gael gwersi addurno blodau fel oeddan ni'n safio ar gyfer canol y byrddau a bouquets y genod.

"Roedd o reit emosiynol gweld i faint o drafferth oeddan nhw 'di mynd."

Gyda'r ddau'n briod ers 10 mlynedd nawr, pa gyngor fyddai gan Nia i unrhyw gyplau eraill yn priodi?

Meddai: "Mae'n bwysig gwneud amser i'n gilydd, i barchu ein gilydd a jyst sbïo nôl lle 'dan ni 'di dod. 'Dan ni efo'n gilydd ers mor hir, ond 'dan ni dal yn neud amser i'n gilydd."

Ac mae'r gallu i wylio'r rhaglen eto'n gysur, meddai: "'Na i sbïo ar y rhaglen eto efo'r plant. Mae o'n neis ac yn enwedig ar ôl colli Taid Trefor, a jyst cael gweld o yn fyw ar y sgrin eto.

"Mae 'na atgofion eto o ddiwrnod mor hapus."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.