Dau o Bwllheli, o bosib, wedi marw ar y môr oherwydd difrod i'w caiacau

Bu farw dau o Bwllheli ar ôl mynd i'r môr mewn dau gaiac gwynt - clywodd cwest.

Yn gynharach roedd y ddau wedi cael eu gweld yn trwsio'r ddau gaiac.

Roedd Simon Wilson, 35, a Connor Parfitt, 24, yn gweithio fel glanhawyr ym mharc gwyliau Hafan y Môr. Roedd y ddau hefyd yn byw yno mewn llety ar gyfer staff.

Diflannodd y ddau ar ôl gadael traeth wrth ymyl y parc gwyliau, brynhawn Mawrth 21 Gorffennaf.

Dywedodd y Crwner ei bod hi'n bosib bod caiacau'r ddau wedi cael eu difrodi tra allan ar y môr a daeth i gasgliad bod eu bod wedi marw'n ddamweiniol.

Bu Simon Wilson yn byw y rhan fwyaf o'i fywyd yn ardal Porthmadog. Roedd ganddo bedwar o blant a bu'n gweithio fel glanhawr yn Hafan y Môr ers mis Chwefror 2025.

Symudodd Connor Parfitt i ogledd Cymru o Blackpool er mwyn cael dechrau newydd, ar ôl cyfnod anodd yn ei fywyd.

Roedd datganiad gan ei frawd yn dweud, tra ei fod yn byw yng Nghaerhirfryn, ei fod wedi colli ffrind agos a fu farw yn ei freichiau.

Clywodd y cwest yng Nghaernarfon fod y ddau ddyn wedi'u gweld yn llety staff y parc gwyliau yn trwsio caiacau gwynt, gyda thâp ac offer trwsio tyllau gwynt.

Drannoeth, ddydd Mawrth 21 Gorffennaf, cafon nhw eu gweld yn mynd am y môr.

Rhyw awr yn ddiweddarach mi gafon nhw eu gweld yn padlo tua milltir allan o'r arfordir, heb fod mewn unrhyw anhawster na straen.

Ni ddaeth y ddau fyth yn eu holau ac yna mi gafon nhw eu hadrodd o fod ar goll.

Cafodd corff Connor Parfitt ei ganfod ar y traeth ger Llanfarian, Ceredigion, y dydd Sul canlynol ar 26 Gorffennaf.

Mi gafodd corff Simon Wilson ei ganfod yn arnofio ar ddŵr agos i'r lan yn Llwyngwril, Gwynedd, ddydd Mawrth 28 Gorffennaf - wythnos ers i'r ddau ddiflannu.

Dangosodd archwiliadau post mortem fod Connor Parfitt wedi marw o hypothermia yn sgil bod mewn dŵr ar ôl cyfnod o ymprydio, a bod Simon Wilson wedi boddi.

Dywedodd y Crwner Kate Robertson ei bod hi'n bosib bod y ddau ar goll ar y môr o ganlyniad i ddifrod i'w caiacau.

Dywedodd wrth deulu Simon Wilson, oedd yn y gwrandawiad, nad oedd hi'n "gallu dychmygu pa mor anodd oedd hi tra bod y chwilio yn digwydd".

"Does dim geiriau'n gallu mynegi'n ddigonol yr hyn aethoch drwyddo.

"Mi ddywedaf yr un peth wrth deulu Connor, rwy'n cydymdeimlo'n ddiffuant gyda'r ddau ohonoch."

Cofnododd hi mai damweiniol oedd y marwolaethau yn ei chasgliad.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.