Cyn-gapten Cymru Jess Fishlock yn ymddeol o bêl-droed

Mae Jess Fishlock, un o sêr mwyaf hanes pêl-droed Cymru, wedi ymddeol o'r gamp gan ddod â gyrfa broffesiynol o 24 mlynedd i ben.

Chwaraeodd Fishlock, 39, ei gêm olaf dros Seattle Reign yn yr Unol Daleithiau nos Sul wrth i'r clwb golli 1-0 yn erbyn Gotham FC yn rownd wyth olaf gemau ail-gyfle y NWSL.

Dechreuodd Fishlock ei gyrfa gyda chlwb ei thref enedigol, Caerdydd, yn 2002, cyn mynd ymlaen i chwarae i sawl clwb gan gynnwys AZ Alkmaar, Lyon, Frankfurt a Melbourne Victory.

Mae hi wedi ennill mwy o gapiau rhyngwladol (166), ac wedi sgorio mwy o goliau (48) nag unrhyw chwaraewr arall yn hanes y gêm yng Nghymru.

Hi hefyd sgoriodd gôl gyntaf Cymru erioed yn un o'r prif bencampwriaethau rhyngwladol - a hynny yn ystod y golled o 4-1 erbyn Ffrainc yn Euro 2025.

Cyhoeddodd ei hymddeoliad rhyngwladol ym mis Hydref 2025 ar ôl 19 mlynedd yn cynrychioli ei gwlad, tra bod Seattle Reign wedi cadarnhau ym mis Ebrill y byddai hi'n ymddeol ar ddiwedd y tymor wedi 13 o flynyddoedd gyda'r clwb.

Dywedodd Seattle ei bod "nid yn unig yn un o'r chwaraewyr gorau yn hanes y gynghrair yng ngogledd America, ond un o'r rhai mwyaf dylanwadol yn hanes y gêm".

Wrth edrych yn ôl ar ei gyrfa, dywedodd Fishlock mai ei hymrwymiad i Gymru a Seattle Reign oedd un o'r pethau roedd hi fwyaf balch ohono.

"Yr hyn rwy'n fwyaf balch ohono yn fy nghalon yw fy mod wedi aros gyda Chymru – roedd hynny'n anodd am 20 mlynedd, ond ni fyddwn wedi gwneud pethau'n wahanol – ac wedi aros gyda'r Reign am 14 mlynedd," meddai.

Ychwanegodd: "Pan chi'n ennill gyda'ch pobl chi, y bobl rydych chi wedi brwydro gyda nhw, wedi colli gyda nhw ac wedi methu gyda nhw, does dim teimlad gwell yn y byd."

Dywedodd cyn-gapten Cymru ac Is-lywydd UEFA, Laura McAllister, ei bod yn anodd dod o hyd i'r geiriau i ddisgrifio cyfraniad Fishlock i'r gêm.

"Mae'n anodd meddwl am eiriau i ddisgrifio rhywun fel Jess. Chwaraewr eiconig, chwaraewr arbennig, rhywun sydd wedi gwneud popeth yn y gêm," meddai.

Ychwanegodd nad oedd modd gorbwysleisio ei dylanwad ar bêl-droed merched yng Nghymru.

"S'neb yn gallu cymryd lle Jess yn sicr. Mae hi wedi gwneud gymaint i ddatblygu'r gêm yng Nghymru."

"I Jess, y peth pwysicaf oedd wastad gallu chwarae i Gymru a chreu'r math yna o gystadleuaeth bob wythnos i sicrhau ei bod hi'n chwarae ar ben ei gêm. Mae Cymru yn golygu gymaint i Jess."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.