Cyhuddo dyn ar ôl digwyddiad yn ymwneud â saethu gwn yn Nhreforys

Mae dyn 29 oed wedi'i gyhuddo mewn cysylltiad â digwyddiad yn ymwneud â saethu gwn yn ardal Treforys, Abertawe.

Cafodd swyddogion arfog eu galw i Heol y Clâs yn Nhreforys tua 16:15 ddydd Gwener. Yn ôl yr heddlu, roedd car wedi dioddef difrod oedd yn gyson ag effaith ergyd gwn.

Mewn datganiad fore Llun, daeth cadarnhad fod Thomas Gilheany, 29 oed o Abertawe, wedi'i gyhuddo o affräe a meddu ar arf ymosodol.

Mae disgwyl iddo ymddangos yn Llys Ynadon Abertawe yn ddiweddarach.

Cafodd dyn 41 oed o Lansamlet a bachgen 16 oed eu harestio mewn cysylltiad â'r digwyddiad hefyd, ond mae'r ddau bellach wedi'u rhyddhau ar fechnïaeth.

Cafodd sawl ffordd yn yr ardal eu cau i'r cyhoedd yn dilyn y digwyddiad brynhawn Gwener, cyn ailagor ddydd Sadwrn.

Dywedodd Heddlu'r De nad oeddent yn ymwybodol o unrhyw anafiadau yn gysylltiedig â'r digwyddiad, ac nad oedd unrhyw fygythiad ehangach i'r cyhoedd.

Aelodau Tîm Ymchwiliadau Troseddau Mawr Heddlu De Cymru sy'n arwain yr ymchwiliad.

Dywedodd y Prif Uwcharolygydd Stephen Jones: "Mae ein hymchwiliad, sy'n cynnwys timau o dditectifs a staff arbenigol, yn parhau.

"Mae digwyddiadau fel hyn yn brin, ond rydym yn gwerthfawrogi eu bod yn achosi cryn bryder mewn cymunedau lleol.

"Bydd presenoldeb amlwg yr heddlu yn parhau yn yr ardal wrth i swyddogion barhau â'u hymholiadau a rhoi sicrwydd i drigolion lleol.

"Hoffwn ddiolch i aelodau'r cyhoedd sydd wedi cynorthwyo ein hymchwiliad hyd yma."

Mae swyddogion yn dal i apelio am wybodaeth gan unrhyw un a welodd y digwyddiad, neu sydd â lluniau dashcam, teledu cylch cyfyng neu ffôn symudol a allai helpu'r ymchwiliad.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.