Carcharu dyn am ddwyn tacsi a gyrru ar ochr anghywir yr A55 ar ôl cymryd cyffuriau

Mae dyn o Ddulyn wnaeth ddwyn bws mini ar ôl cyrraedd Caergybi ar fferi, cyn taro beiciwr a gyrru ar ochr anghywir yr A55 ar gyflymder uchel, wedi ei garcharu am dair blynedd.

Cafodd Darragh O'Grady, 31 oed, ei ddedfrydu yn Llys y Goron Caernarfon ar ôl pledio'n euog i saith trosedd.

Clywodd y llys ei fod dan ddylanwad cyffuriau ac alcohol adeg y digwyddiad.

Dywedodd y barnwr Timothy Betts wrth O'Grady, sy'n dad i ddau o blant ifanc, fod y digwyddiadau'n "hynod beryglus", gan ychwanegu mai "dim ond lwc pur oedd hi na wnaethoch chi ladd eich hun na rhywun arall".

Cyrhaeddodd O'Grady Gaergybi ar 24 Awst ar daith i ymweld â'i ewythr sy'n byw yn y DU.

Erbyn iddo ddod oddi ar y fferi, roedd wedi dwyn ffôn symudol menyw a nifer o'i chardiau banc, gan ddefnyddio'r cardiau i wario rhwng £100 a £200.

Tua 19:00, fe wnaeth ddwyn bws mini oedd yn perthyn i gwmni tacsi lleol. Gyrrodd o amgylch Caergybi cyn mynd ar hyd yr A5 i gyfeiriad Y Fali.

Ar yr A5, fe darodd O'Grady Richard Owen Roberts, oedd yn beicio ar y ffordd, gyda drych ochr y bws mini.

Cafodd Mr Roberts ei daro'n anymwybodol, torrodd ddwy asen a chafodd anaf i'w iau a chrafiadau niferus ar ei gorff.

Roedd ei anafiadau mor ddifrifol nes iddo gael ei gludo i Ysbyty Brenhinol Stoke, lle bu'n aros dros nos.

Clywodd y llys fod O'Grady hefyd wedi pasio beiciwr arall ar gyflymder uchel. Dywedodd y beiciwr hwnnw ei fod yn credu y byddai yntau wedi cael ei daro hefyd pe na bai drych ochr y bws mini eisoes wedi ei ddifrodi.

Yna gyrrodd O'Grady ar hyd yr A55 i'r dwyrain, ond ar ochr anghywir y ffordd.

Roedd yn gyrru ar gyflymder uchel, gan wyro i mewn ac allan o lonydd a tharo nifer o gerbydau wrth i yrwyr eraill geisio ei osgoi.

Roedd perchennog y cwmni tacsi wedi mynd i chwilio am y bws mini pan ddaeth ar ei draws yn gyrru tuag ato ar ochr anghywir y ffordd.

Bu'n rhaid iddo wyro er mwyn osgoi gwrthdrawiad.

Dywedodd O'Grady wrth y gwasanaeth prawf ei fod wedi cymryd valium a chocên, yn ogystal ag yfed alcohol, ar ddiwrnod y troseddau.

Pan geisiodd swyddogion ei stopio, gwrthododd O'Grady gydymffurfio. Bu'n rhaid i'r heddlu ddefnyddio stribed pigau (stinger) i atal y cerbyd, ac roedd yn amlwg iddyn nhw fod O'Grady dan ddylanwad alcohol a chyffuriau.

Gwrthododd ddarparu samplau anadl neu samplau ar gyfer profion cyffuriau.

Dywedodd y barnwr fod gyrru ar ochr anghywir yr A55 yn "hollol wirion a chwerthinllyd", gan ychwanegu ei bod yn "anodd iawn deall" pam bod O'Grady wedi gweithredu fel y gwnaeth.

Plediodd O'Grady yn euog i achosi anaf difrifol drwy yrru'n beryglus, a chafodd ei garcharu am dair blynedd am y drosedd honno.

Mae wedi ei wahardd rhag gyrru am bum mlynedd a chwe mis, a bydd yn rhaid iddo basio prawf gyrru estynedig cyn cael gyrru yn y DU eto.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.